غزہ میں اب صبح دھماکوں کی آواز سے شروع نہیں ہوتی، بلکہ بھوک کی خاموش اور ہنگامی پکار سے ہوتی ہے۔
ماں جاگتی ہے تو اس کے بچوں کے لیے دودھ نہیں ہوتا۔ بچے خالی پیٹ کی تسکین کی خاطر کچرے میں سے کھانے کے ٹکڑوں کی تلاش میں نکلتے ہیں، اس سے پہلے کہ بم واپس آ جائیں اور جو کچھ امید باقی رہ گئی ہے اسے بھی زمیں بوس کر ڈالیں۔
یہ کوئی مبالغہ آرائی نہیں ہے، یہ ایک تاریک اور دستاویزی حقیقت ہے۔ غزہ نہ صرف بمباری تلے ہے، یہ محاصرے میں بھی ہے، اور اب سب سے گہرا زخم دینے والا ہتھیار بھوک ہے۔ کیونکہ بھوک ایک خاموش ہتھیار ہے، دنیا نگاہیں پھیر لیتی ہے، جیسے آہستہ آہستہ آنے والی موت کوئی معنی نہ رکھتی ہو۔
مہینوں سے غزہ کے عوام دوہرے محاصرے کا سامنا کر رہے ہیں۔ ایک طرف روزانہ کی بمباری جبکہ دوسری طرف عالمی لاپرواہی۔ سرحدی گزر گاہیں بند ہیں۔ کھانا ڈھونڈنے والوں کو گولی مار دی جاتی ہے۔ انسانی امداد کی سپلائی لائنیں منظم انداز میں توڑ دی گئی ہیں۔ روٹی ایک فسانہ بن چکی ہے، پانی روزانہ کی ایک جنگ ہے، اور دوا ایک نایاب معجزہ بن چکی ہے۔
جو ہو رہا ہے ’انسانی المیہ‘ کا لفظ اس کے معنی بیان کرنے سے قاصر ہے۔ اب جو کچھ ہو رہا ہے وہ بھوک سے مارنے کی ایک دانستہ مہم ہے، جو کہ دنیا کی ہر قانونی اور اخلاقی تعریف میں نسل کشی کے زمرے میں ہی آتی ہے۔
غزہ سے خفیہ طور پر نکالی گئی فوٹیچ میں روٹی کے لیے قطار میں کھڑے بچوں کو بھوک سے بے ہوش ہوتے دیکھا جا سکتا ہے، خاندان گھاس کھانے پر مجبور ہیں، مائیں ایک ہی روٹی کو چار بھوکے بچوں میں تقسیم کرتی ہیں، یہ بم نہیں ہیں جو انہیں قتل کر رہے ہیں، یہ غذائی قلت کا شکار کمزور ہوتے جسموں کی آہستہ آہستہ جاری تباہی ہے۔
غزہ کے لوگ کچھ ناممکن نہیں مانگ رہے، وہ عالمی ضمیر کا بس ایک چھوٹا سا حصہ مانگ رہے ہیں۔
اس وقت بھوک سے بھی زیادہ تکلیف دہ یہ خاموشی ہے۔
حملے کے ابتدائی ایام میں مغربی راہنماؤں نے محتاط بیانات جاری کیے: تحمل کی اپیل، بین الاقوامی قوانین کی یاد دہانی، تشویش کا اظہار۔ لیکن وہ آوازیں بھی اب ختم ہو چکی ہیں، بھلا دی گئی ہیں، پرانی پریس ریلیزز میں دفن ہو چکی ہیں۔ نہ کوئی عمل ہوا اور نہ ہی کوئی پالیسی بدلی۔
اس کی بجائے اسرائیل کی حمایت میں شدت آئی۔ کچھ حکومتوں نے تو غزہ کی تباہی کے دوران اقوام متحدہ کی مرکزی امدادی ایجنسی UNRWA کے لیے فنڈنگ بھی معطل کر دی۔
کیا آپ نے کبھی سنا ہے کہ کوئی حکومت جب بچے بھوک سے مر رہے ہوں تب کسی انسانی امدادی ایجنسی سے امداد واپس لے لے؟
یہ ہوا، اور یہ بہت خاموشی سے (بغیر کسی ردّ عمل کے) ہوا۔
جیسے نیلسن منڈیلا نے ایک بار کہا تھا:
’’لوگوں سے ان کے انسانی حقوق روک لینا ان کی انسانیت کو چیلنج کرنا ہے۔‘‘
آج غزہ کو نہ صرف بموں سے سزا دی جا رہی ہے بلکہ بھوک سے بھی۔ اجتماعی سزا کی ایک ایسی شکل جو ایک ایسے بین الاقوامی اتفاق رائے سے ممکن ہوئی ہے جو اتنا بزدل ہے کہ کچھ کہہ نہیں سکتا۔ آپ کو یہ اتفاق رائے سرکاری بیانات میں نظر نہیں آئے گا، لیکن آپ اسے ہر بند سرحد، ہر خالی پیالے اور ہر اس بچے میں دیکھ سکتے ہیں جو پیاس کی شدت سے روتا ہے۔
اقوام متحدہ کی ایجنسیوں کے مطابق:
- غذائی بحران تباہ کن سطح پر پہنچ چکا ہے۔
- غزہ کے ۹۰ فیصد سے زیادہ بچے غذائی قلت کا شکار ہیں۔
- بھوک اور پانی کی کمی سے شیر خوار بچوں کی اموات اب روزمرہ کا معمول ہیں۔
پھر بھی دنیا خاموش ہے!
اس سے بھی بد تر یہ ہے کہ بعض حکومتیں اسرائیل کے اقدامات کو’’ذاتی دفاع‘‘ کا نام دے کر جواز پیش کرتی ہیں، جیسے بھوک کو بطور ہتھیار استعمال کرنا بالکل جائز ہو۔
لیکن ذمہ داری صرف مغرب پر عائد نہیں ہوتی!
مصر کو بھی اپنے کردار پر جواب دہ ہونا پڑے گا۔ رفح کراسنگ، غزہ کا واحد راستہ جو اسرائیل کے کنٹرول میں نہیں، مہینوں سے بند ہے۔ قاہرہ امداد اندر بھیجنے یا مریضوں کو باہر نکالنے کے لیے اجازت تل ابیب سے طلب کرتا ہے۔ ہم کب تک یہ بہانہ تراشتے رہیں گے کہ یہ غیر جانبداری ہے؟
یہ جرم میں شرکت ہے!
اور ان عرب حکومتوں کا کیا جنہوں نے اسرائیل کے ساتھ تعلقات بحال کیے؟ کچھ خاموش رہیں، کچھ اس سے بھی دو ہاتھ آگے بڑھیں اور اس وقت جب غزہ بھوک سے مر رہا تھا انہوں نے اسرائیل کے ساتھ تعلقات مزید مضبوط کیے۔ کم از کم مغرب (اہل غزہ سے) تعلق کا دعویٰ تو نہیں کرتا۔ لیکن یہ حکومتیں کرتی ہیں، لیکن اپنے فلسطینی بھائیوں کے دکھ کا مداوا کرنے کے لیے کچھ نہیں کرتیں۔
جیسا کہ اقوام متحدہ کے سابق سیکریٹری جنرل کوفی عنان نے ایک بار خبردار کیا تھا:
’’جب کھانا ہتھیار بن جاتا ہے تو انسانیت خود تباہ ہو جاتی ہے۔‘‘
غزہ اس تباہی کا سامنا کر رہا ہے اور عالمی نظام اسے تباہ ہونے دے رہا ہے۔
پھر بھی، سب کچھ کے باوجود، غزہ ثابت قدم ہے۔ اس کے عوام بھوک کو مزاحمت میں بدل رہے ہیں، وہ مقابلہ کر رہے ہیں حتیٰ کہ جب ان سے سب کچھ چھین لیا گیا ہے تب بھی۔ غزہ میں عزت آرام میں نہیں نظر آتی، یہ بقا میں نظر آتی ہے۔
لیکن ایمانداری سے سوچیں: اسرائیل اکیلے یہ سب جاری نہیں رکھ سکتا۔ اس کا انحصار اس خاموشی پر ہے، غم و غصے کے نپے تلے اظہار پر ہے، سفارتی پردہ پوشی پر ہے، اور یہی وہ چیز ہے جو اسے ان عالمی طاقتوں سے حاصل ہوتی ہے جو انسانی حقوق کے علمبردار ہونے کا دعویٰ کرتی ہیں، لیکن یہ اپنی مرضی سے منتخب کرتی ہیں کہ کون سےمتاثرین اہمیت کے حامل ہیں۔
تو غزہ کے ساتھ پھر درحقیقت کون کھڑا ہے؟
کوئی حکومت نہیں، کوئی ادارہ نہیں، بلکہ عام لوگ۔ مظاہرین، عام شہری۔ وہ جو اب بھی ضمیر رکھتے ہیں اور آنکھیں پھیر لینے سے انکاری ہیں۔
غزہ کو کسی کے ترس کی ضرورت نہیں، اسے انصاف چاہیے۔ یہ نسل کشی کے خاتمے کا مطالبہ کرتا ہے، اور ان کے احتساب کا جنہوں نے اسے ممکن بنایا ہے۔
اب سوال یہ نہیں رہا کہ : ہو کیا رہا ہے؟
ہم اچھی طرح جانتے ہیں۔
اب سوال یہ ہے کہ: عمل کون کرے گا؟
اور جب تاریخ لکھی جائے گی، تو کون اپنی خاموشی کی وجہ سے جانا جائے گا۔
کیونکہ خاموشی، اس بھوک کے سامنے، غیر جانبداری نہیں!
یہ جرم میں شرکت ہے!
[یہ مضمون ایک معاصر آن لائن جریدے میں شائع ہو چکا ہے۔ مستعار مضامین، مجلے کی ادارتی پالیسی کے مطابق شائع کیے جاتے ہیں۔ (ادارہ)]
٭٭٭٭٭
