صلاح واصلاح کا اسلامی نظام

عالمگیر فساد

صلاح و اصلاح کا جو عالمی نظام اسلام نے پیش کیا ہے، اگر اس کو دنیا اختیار کر لے تو فساد و افساد کے عالمگیر ماحول میں تبدیلی لائی جا سکتی ہے، سیلاب جتنا تیز ہو بند اس کی شدت کو دیکھ کر باندھا جاتا ہے، آج پوری دنیا جس طرح کرپشن کا شکار ہے، اتنے وسیع پیمانہ پر شاید ہی کبھی بگاڑ پھیلا ہو، قرآن مجید نے اس کی وجہ بھی بیان کردی ہے:

اعمال کی خاصیتیں

اللہ تعالیٰ نے جس طرح اشیاء میں خواص رکھے ہیں ، اسی طرح اعمال میں بھی خواص رکھے ہیں ، حدیثوں میں اس کی تفصیلات موجود ہیں ، گانے بجانے اور فحاشی کی خصوصیت یہ ہے کہ اس کے بعد زلزلوں اور طوفانوں کی کثرت ہوتی ہے، زمانہ اس کا گواہ ہے، دنیا میں آج فحاشی اور گانے بجانے کو جس طرح ایک فن کی شکل دے دی گئی ہے اور اس کو تعلیم کا اہم جزء بنا دیا گیا ہے، شاید پہلے اس کا تصور بھی نہ کیا گیا ہو گا، اس کا نتیجہ یہ ہے کہ مختلف ملکوں میں زلزلوں اور طوفانوں کا ایک تسلسل سا معلوم ہوتا ہے۔

دنیا میں قیامت سے پہلے قیامت کا منظر نگاہوں کے سامنے ہے، ہر شخص کو صرف اپنی فکر لگی ہے، اپنے تھوڑے سے فائدہ کے لیے وہ سب کچھ کرنے کے لیے تیار ہے، اس خود غرضی کی خاصیت بے برکتی ہے، اور اس کا نتیجہ یہ ہے کہ افراد افراد کے ساتھ، جماعتیں جماعتوں کے ساتھ اور ملک ملکوں کے ساتھ برسر پیکار ہیں ، عدل و انصاف کے پیمانے بدل گئے ہیں ، اصول و اخلاق کا توازن بگڑ گیا ہے۔

اصلاح کی دعوت

اسلام نے صرف صلاح ہی نہیں بلکہ اصلاح کی بھی دعوت دی ہے، سیلاب آتا ہے تو کوئی اپنے گھر کے دروازے بند کر کے محفوظ نہیں رہ سکتا، تیز موجیں اس کا خاتمہ کر کے دم لیں گی، اس کا طریقہ صرف یہ ہے کہ سیلاب کو روکنے کی کوشش کی جائے اور اس کے لیے اپنی جان کی بازی لگا دی جائے۔

موجودہ عالمی نظام کا سب سے بڑا نعرہ آزادی کا ہے، کوئی کچھ بھی کرے کسی کو اس وقت تک روکنے کا حق نہیں جب تک وہ دوسرے سے تعرض نہیں کرتا اور اس قانون میں بھی ایسا کھوکھلا پن ہے کہ ملک ملک کو ہڑپ کر جاتے ہیں ، کسی کے منہ میں زبان نہیں جو بولے ’’جس کی لاٹھی اس کی بھینس‘‘ کا اندھا نظام اپنی ترقی یافتہ شکل میں پوری طرح موجود ہے۔

اسلام نے اپنے ماننے والوں کو اس کا مکلف کیا ہے کہ وہ صلاح کے ساتھ اصلاح کے عمل کو جاری رکھیں ، آپس کے جھگڑوں کو دور کریں ، نزاعات کا تصفیہ کریں ، تاکہ اللہ کی بخشی ہوئی صلاحیتیں صحیح مثبت اور تعمیری کاموں میں صرف ہوں ، خاص طور پر اگر ایمان والوں میں نزاعی شکلیں پیدا ہو جائیں تو اصلاح کی ہر ممکن کوشش کی جائے۔

آپس کے جھگڑوں کا وبال

آپس کے جھگڑے خواہ کتنے ہی معمولی کیوں نہ نظر آتے ہوں ، اسلام میں ان کو بدترین گناہوں میں شمار کیا گیا ہے، ایک حدیث میں ان کو ’’حالقہ‘‘1سے تعبیر کیا گیا ہے، حالقہ استرے کو کہتے ہیں ، جس طرح استرے سے سر کے بال صاف ہو جاتے ہیں ، اسی طرح آپس کے جھگڑوں سے دین آہستہ آہستہ نکل جاتا ہے، جو اعمال کیے گئے ہیں اس کا خطرہ پیدا ہو جاتا ہے کہ وہ اعمال رائیگاں نہ چلے جائیں ، اس لیے کہ نزاع میں عام طور پر آدمی اپنی زیادتی محسوس نہیں کر پایا، وہ فریق ثانی پر ظلم کرتا ہے، لیکن اپنے آپ کو مظلوم سمجھتا ہے، دوسرے کا حق مارتا ہے، اس کے ساتھ نا انصافی کرتا ہے، لیکن خود انصاف کی دہائی دیتا ہے، اس کے اس ظلم و زیادتی کے نتیجہ میں حرماں نصیبی اس کا مقدر بنتی ہے، دنیا میں وہ اس کو اپنی عزت کا سوال سمجھتا ہے، لیکن آخرت میں اس سے بڑھ کر مفلس کون ہو گا کہ نیکیوں کے باوجود اس کے بارے میں جہنم کا فیصلہ کر دیا جائے۔

جھگڑوں کی خاصیت اور اس کا نتیجہ یہ ہوتا ہے کہ کمزوری پیدا ہو جاتی ہے، دشمن کو غالب آنے کے مواقع حاصل ہو جاتے ہیں ، قرآن مجید میں ارشاد ہے:

صلح صفائی کا حکم

جس طرح خود جھگڑوں میں پڑنا باعث خفت و ذلت ہوتا ہے اور اس سے دور رہنے کی تلقین کی گئی ہے، اسی طرح اہل ایمان کو یہ حکم بھی دیا گیا ہے کہ جھگڑے کے ماحول کو بھی بدلنے کی کوشش کریں اور اگر اہل ایمان آپس میں الجھ رہے ہوں تو ان میں صلح کرا دی جائے، دو ٹوٹے دلوں کو جوڑنا اور آپس میں صلح کرا دینا اتنا اہم اور فضیلت والا کام ہے کہ اس کے لیے اگر کچھ بات بھی بنانی پڑے تو اس کی اجازت دی گئی ہے۔

سورۃالحجرات کی چھٹی آیت میں یہ حکم تھا کہ ہر سنی سنائی بات پرکان نہ دھرا جائے، اگر ایسا شخص کوئی خبر لے کر آیا ہے جس کا اعتبار نہیں تو بغیر تحقیق کوئی اقدام نہ کیا جائے، اگر غلطی ہو گئی تو اس کا نتیجہ جھگڑے کی شکل میں ظاہر ہو گا، اور یہ بات بڑھتے بڑھتے قتل و غارت گری تک پہنچ سکتی ہے، اسی لیے اسی سورہ کی نویں آیت میں یہ تلقین کی جا رہی ہے کہ اگر اہل ایمان میں جھگڑے کی یہ شکل پیدا ہو تو ان میں صلح کی کوشش کی جائے اور اگر کوئی فریق صلح پر رضامند نہ ہو تو حتی المقدور اس کو اس پر آمادہ کیا جائے، ارشاد ہوتا ہے:

عربی گرامر کا یہ قاعدہ ہے کہ اگر اسم (Noun) پر ’’إن‘‘ کا لفظ آ جائے تو اس کے بعد فعل ماضی، مضارع کے معنیٰ دیتا ہے، یہاں پر بھی بظاہر یہی مفہوم ہے کہ اگر دو گروہوں میں جھگڑا بڑھ جائے اور اس کا خطرہ پیدا ہو جائے کہ وہ قتل و غارت گری شروع کر دیں گے تو دونوں میں صلح کرا دو، صلح کا یہ کام جتنی جلدی کرا دیا جائے، اور بات آگے نہ بڑھنے دی جائے، اتنا ہی یہ آسان ہے، جتنی اس میں تاخیر ہوتی جاتی ہے، دشواریاں بڑھتی جاتی ہیں ۔

خود صلح کرانے میں دشواری ہو اور اس کا غالب امکان ہو کہ دونوں فریق یا دونوں میں سے کوئی ایک فریق اس کی بات ماننے پر رضامند نہ ہو گا تو بہتر ہے کہ درمیان میں ایسے لوگوں سے ثالثی کرائی جائے جن کا دونوں فریقوں پر اثر ہو اور دونوں فریق اس کی بات میں وزن محسوس کرتے ہوں ۔

آیت کے شانِ نزول میں بعض واقعات بھی نقل کیے جاتے ہیں ، لیکن اس میں خطاب جس طرح قرنِ اوّل کے مسلمانوں کو کیا گیا ہے، اسی طرح قیامت تک کے مسلمان اس کے مخاطب ہیں ، ان کی ذمہ داری ہے کہ اصلاح کے عمل کو جاری رکھیں ، اگر صورت حال یہ پیدا ہو کہ ایک گروہ ظلم و زیادتی پر آمادہ ہو جائے اور وہ کسی کی بات سننے کو تیار نہ ہو تو ہر ممکن طاقت سے اس فریق کو ظلم و زیادتی سے روکا جائے، ارشاد ہوتا ہے:

’’بغی‘‘ بغاوت کے معنی میں استعمال ہوتا ہے، لیکن اس کے اصل معنی حد سے تجاوز کرنے اور زیادتی کرنے کے ہیں ، جو فریق بھی زیادتی کر رہا ہو اور بات سننے کا روادار نہ ہو تو مسلمانوں کے نمائندہ اداروں کی ذمہ داری ہے کہ وہ ہر طرح سے روکنے کی کوشش کریں ، جہاں مسلمانوں کے پاس قوتِ نافذہ ہو، وہ اس قوت کا استعمال کریں تاکہ فساد کا وہ دروازہ بند ہو جائے، اور جہاں قوتِ نافذہ نہ ہو وہاں سماج کے دباؤ سے اجتماعی اور قانونی طاقت سے زیادتی کرنے والے فریق کو روکنے کی کوشش کی جائے۔

صلح کرانے کے آداب

آگے جو بات کہی جا رہی ہے وہ صرف اسلام ہی کے متوازن عادلانہ نظام کا ایک حصہ ہے، دوسری جگہ اس کا تصور بھی مشکل ہے، طاقت سے ایک فریق کو روکنے کے باوجود اصلاح کی دوسری کوشش کا حکم دیا جا رہا ہے اور یہ اسی وقت ممکن ہے کہ جب قوت کے استعمال میں بھی اعتدال و توازن قائم رہے، سب سے مشکل ترین کام ہے، آدمی خلاف ہوتا ہے تو دشمنی کی ساری حدود پار کرنے لگتا ہے، چاہتا ہے تو محبوب کی خامیاں خوبیوں کی شکل میں اس کو نظر آتی ہیں ، اسلام کی تعلیم یہ ہے کہ :

دو فریقوں میں ثالثی کرنے والوں کو یہ بنیادی حکم ہے کہ اگر ایک فریق بات نہیں مانتا اور وہ ظلم پر کمربستہ ہے، اس کو بہ زورِ طاقت ظلم سے روک دو، لیکن طاقت کے استعمال میں توازن قائم رہے، اصلاح کی کوشش ابھی ختم نہیں ہوئی، طاقت کے زور پر سہی، جب ایک فریق جھک گیا اور زیادتی سے باز آ گیا تو اب دوبارہ دونوں فریقوں کو جوڑنے کی کوشش کرو اور دلوں کو ملانے کا کام کرو، ارشاد ہوتا ہے:

صلح کی دوسری کوشش کے موقع پر بار بار انصاف کا حکم اسی لیے دیا جا رہا ہے کہ جب صلح کرانے والے، زیادتی کرنے والے فریق کے خلاف طاقت کا استعمال کر چکیں اور اس کی ضرورت اسی لیے پڑی کہ انہوں نے بات نہیں مانی تو طبعی طور پر میلان دوسرے فریق کی طرف ہونے کا غالب امکان ہے، اس اندیشہ کے پیش نظر اس کی تاکید کی جا رہی ہے کہ کسی کی طرف فیصلہ کرنے میں جھکاؤ نہ ہو، اور صلح ممکن بھی اسی وقت ہے کہ جب دونوں فریق صلح کرانے والوں کو ہمدرد سمجھیں اور کسی ایک فریق کی طرف جھکاؤ محسوس نہ کیا جائے:

اس پر پوری آیت کا اختتام کیا جا رہا ہے، جو مسک الختام ہے، صلح و اصلاح کی ساری کوششیں جو بڑی مبارک ہیں ، اور ان پر اجر کے بڑے وعدے ہیں ، اسی وقت کامیاب ہو سکتی ہیں جب انصاف اور عدل کے ساتھ یہ کوششیں کی جائیں ، اور پھر یہ علیٰ العموم انعام ربانی ہے، ان لوگوں کے لیے جو ہر موقع پر انصاف سے کام لیتے ہیں ۔

یہیں سے یہ بات صاف ہو جاتی ہے کہ جب اصلاح ذات البین میں ، ٹوٹے اور روٹھے دلوں کو جوڑنے میں اس قدر اجر و ثواب ہے کہ جھوٹ جیسی برائی کو بھی اس کے لیے ایک حد تک روا رکھا گیا، تو اگر کوئی دلوں کو توڑنے کا کام کرے، لوگوں کو آپس میں لڑائے اور نمک مرچ لگا کر بات کو بگاڑے تو وہ کس قدر غضب الٰہی کا مستحق ہے!

اخوت اسلامی

ایمانی اخوت کی طاقت

اسلام نے اپنے ماننے والوں کو محبت کی ایک لڑی میں پرو دیا، اپنے بیگانے ہو گئے اور بیگانے سگے بھائیوں سے بڑھ کر قرار پائے، خونی رشتہ کی اہمیت اپنی جگہ مسلّم ہے لیکن اسلامی رشتہ خونی رشتہ سے بڑھ کر ہے، خونی رشتہ طبعی اور فطری ہے، اس میں شعورو تعقل کو دخل نہیں ہوتا لیکن ایمانی رشتہ عقل و آگہی کی بنیادوں پر قائم ہوتا ہے، عقل کے راستہ سے یہ محبت دل میں داخل ہوتی ہے پھر کوئی بڑی سے بڑی طاقت اس کو جدا نہیں کر سکتی، خونی رشتے ٹوٹتے ہوئے دیکھے گئے ہیں لیکن ایمان کا رشتہ جب استوار ہو جاتا ہے تو شاید ہی اس کو کسی نے ٹوٹتے ہوئے دیکھا ہو، اس ایمانی رشتہ کی بنیاد ایمان ہے، ایمان کی پختگی کے ساتھ اس کی پختگی قائم ہے، ایمان کی کمزوری سے یہ رشتہ بھی کمزور پڑ جاتا ہے۔

آنحضرت ﷺ کا فیض تربیت

آنحضرت ﷺ کی بعثت سے پہلے لوگ اس رشتہ سے واقف نہ تھے، ان کے تعلقات قبائل کی بنیادوں پر قائم تھے، ان کے یہ تعلقات اور آپس کے رشتے اندھے اصولوں کے ساتھ وابستہ تھے، ان کا نعرہ تھا:

آنحضرت ﷺ نے بعثت کے بعد اسلامی اخوت کا جو رشتہ عطا فرمایا اس کو پاکیزہ اصولوں کے ساتھ جوڑا اور اس کی روشنی میں ان اوّلین مسلمانوں کی ایسی تربیت فرمائی کہ وہ ان تعلیمات میں ڈھل گئے، اسلامی اخلاق و تعلیمات اور اجتماعی زندگی کے اصول ان کے مزاج میں داخل ہو گئے، اسی لیے جب آپ ﷺ نے ایک موقع پر فرمایا:

توانہوں نے فوراً کہا:

آپ ﷺ نے فرمایا :

آپ ﷺ کے فیض صحبت سے ان کے مزاج بدل گئے، کل تک جن کی زبانیں اسی نعرہ کو دہراتے دہراتے نہ تھکتی تھیں ، آج جب آنحضرت ﷺ نے اپنی زبان مبارک سے یہ جملہ دہرایا تو وہ چونک گئے، آپ ﷺ نے اس کا رخ پھیر دیا اور اس کی حقیقت بیان فرما دی کہ تم جس کو مدد سمجھتے ہو وہ دشمنی ہے، مدد تو یہ ہے کہ ظالم کو ظلم سے روک دیا جائے تاکہ وہ اس کے اخروی اور حقیقی نقصانات سے محفوظ رہے۔

صحابہ کی زندگی

اسی پاکیزہ اسلامی بھائی چارہ کا اثرتھا کہ اسلام پھیلتا جاتاتھا اوراسلامی برادری بڑھتی جاتی تھی، اس میں رنگ ونسل کی کوئی تمیز نہ تھی، کوئی حبش کا ہے توکوئی فارس کا، کوئی خالص عربی النسل ہے توکوئی عجم کے خاندان کا فرد ہے، سب ایک دسترخوان کے شریک ہیں ، سب اپنے اپنے ظرف کے اعتبار سے لے رہے ہیں ، کسی کو کسی سے کوئی عار ہے نہ بیر، یہ اسی اسلامی اخوت کا نمونہ تھا کہ عرب کے سردار فاروق اعظم ﷜ایک حبشی نزاد سیاہ فام کے بارے میں ’’سیدنا‘‘3 ہمارے آقا کے الفاظ استعمال کررہے ہیں ، حضرت بلال مؤذن رسول ﷺ کو یہ رتبہ کہاں سے ملا؟ یہ اسی اسلامی اخوت کا نتیجہ تھا۔

حضرات صحابہ کا مزاج بن چکا تھا، وہ اس اسلامی اخوت کے حامل و ترجمان تھے، پھرہجرت مدینہ کے موقع پر آنحضرت ﷺ نے مواخات کی جوفضا قائم فرمائی، مہاجرین و انصار کے درمیان اس کے نتیجہ میں جومحبت قائم ہوئی تاریخ اس کی مثال پیش نہیں کرسکتی، ایک ایک مہاجر کوانصاری کا بھائی قراردیاگیا، حضرات انصار نے اس کا حق ادا کردیا، اپنا کل مال دوحصوں میں تقسیم کردیا اورمہاجرین کو اس میں پوری طرح شریک کرنا چاہا، اس کی انتہائی مثال یہ ہے کہ ایک انصاری نے کہا کہ میری دوبیویاں ہیں آپ جس کو پسند کرنا چاہیں قبول کرلیں میں طلاق دے دیتا ہوں ، آپ اس سے نکاح کرلیں ۔ حضرات مہاجرین کہاں اس پر راضی ہوتے، انہوں نے کہا کہ بازار کا پتہ بتادیجیے، یہ مال آپ کو مبارک ہو۔4

اسی اسلامی اخوت کا نتیجہ تھا کہ اوس وخزرج کے قبائل جن کی دشمنی سالہا سال سے چلی آرہی تھی، جنگ بعاث جن میں چالیس سال تک جاری رہ چکی تھی اسلام نے اس طرح ان کو جوڑدیا کہ آج دونوں کی الگ الگ پہچان مشکل ہے، دنیا دونوں قبیلوں کو انصار کے نام سے جانتی ہے، اللہ تعالیٰ نے اس احسان کا ذکر قرآن مجید میں فرمایا ہے:

سورہ الحجرات کی دسویں آیت میں اسی بات کو تازہ کیاگیا ہے، ارشاد ہوتاہے:

رشتہ محبت

آیت کے اس حصہ میں کئی باتیں قابل غور ہیں ، بھائی کابھائی سے کیا رشتہ ہوتا ہے، کیسی محبت ہوتی ہے، آج خالص مادی دورمیں شاید اس کو سمجھنا مشکل ہو، یورپ کے خالص مادی اورمیکانکی نظام زندگی نے ساری انسانی قدریں خاک میں ملادیں ، اخبار میں اکثر یہ خبریں بھی آنے لگی ہیں کہ ماں نے بیٹے کو قتل کیا، نوزائیدہ بچہ کواس کی ماں کوڑے دان میں ڈال گئی، بعثت نبوی سے پہلے عربوں میں ہزار جاہلیت کے باجود یہ درندگی نہ تھی، وہ بھائی کے رشتۂ محبت سے آشناتھے، اسی رشتہ کی طرف اشارہ کیا جارہا ہے، ایک بھائی کا بھائی سے جوتعلق ہوتا ہے وہی تعلق ایک ایمان والے کا دوسرے ایمان والے سے ہوتا ہے۔ دوسری بات یہ ہے کہ تشبیہ میں کوئی واسطہ اختیارنہیں کیاگیا،یہ نہیں کہاگیا کہ ایمان والے بھائیوں کی طرح ہیں ، براہ راست کہا جارہا ہے کہ وہ توبھائی بھائی ہیں ۔ تیسری ایک بات اورقابل توجہ ہے، وہ یہ ہے کہ بات کہنے سے پہلے ’’إنما‘‘ کا لفظ استعمال ہوا ہے، عربی گرامر کا قاعدہ یہ ہے کہ اگرلفظ ’’إنما‘‘ کے ساتھ کسی چیز کی خبر دی جارہی ہو تووہ خبر بالکل نئی نہیں ہوتی، لوگ اس کے بارے میں پہلے سے واقف ہوتے ہیں گویا اس میں یہ اشارہ ہے کہ تم اخوت ایمانی سے واقف ہوتوتمہیں اس کا خیال رکھنا چاہیے۔

زندگی کا مزہ

آگے بطور خاص اس چیز کا ذکرکیا جارہا ہے جس کی تمہید کے طورپر إِنَّمَا الْمُؤْمِنُوْنَ إِخْوَۃٌ کہا گیا ہے، ارشاد ہوتا ہے:

یہ پوری آیت درحقیقت گذشتہ آیت کا تتمہ ہے جس میں یہ حکم تھا کہ اگر دو مسلمان گروہوں میں تصادم ہوجائے توتمہیں صلح صفائی کرادینی چاہیے، یہاں اس کی تحریض کی جارہی ہے، اوراس کی وجہ بھی بیان ہورہی ہے کہ اگردوبھائیوں میں جھگڑا ہوجائے توبقیہ بھائیوں کورشتۂ

محبت کی بنا پر اس کی فکر ہوتی ہے کہ دونوں کو ملادیا جائے تاکہ سب کو اس مصیبت سے نجات ملے اورزندگی کامزہ آئے، اسی طرح ایمانی رشتۂ اخوت میں بھی جوکسی طرح بھی خونی رشتہ سے کم نہیں بلکہ بعض وجوہات کی بنا پر اس سے بڑھ کر ہے، یہی فکرہونی چاہیے، اگردوایمان والوں میں یا دومسلمان گروہوں میں نزاع ہو توبقیہ ایمان والے بھائیوں کی یہ ذمہ داری ہے کہ صلح صفائی کی فکر کریں تاکہ بہتر ماحول پیدا ہو،آپس کے تعلقات استوار رہیں اورجینے کا مزہ آئے، آیت کے اخیر میں فرمایا:

اس میں خطاب صرف صلح کرانے والوں کوہی نہیں ہے بلکہ دونوں جھگڑنے والے فریق بھی اس میں شامل ہیں، اورتمام مسلمانوں کے لیے ایک عمومی حکم بھی ہے،تقوی کی زندگی اختیارکرنے سے مومن اللہ کی رحمت خاص کا مستحق بنتا ہے، عام طورپر جھگڑے دل کے میل سے پیدا ہوتے ہیں، کینہ کپٹ، حسد، غیبت، چغلی، حق تلفیاں جھگڑوں کی بنیاد بنتی ہیں، اگرتقوی مزاج میں داخل ہوگا تودلوں میں صفائی پیدا ہوگی، قلبی امراض سے شفاملے گی، دل آئینہ کی طرح شفاف ہوجائے گا، اپنی برائیاں نظر آنے لگیں گی، اب دوسروں کی آنکھوں کے شہتیر کے بجائے اپنی آنکھ کے تنکے نظر آئیں گے، دوسروں کے لیے چشم پوشی کا مزاج بنے گا، اور اس کے نتیجہ میں بہترسے بہتر ماحول پیدا ہوگا، دونوں فریقوں کوبھی صلح کے لیے تقوی اختیارکرنے کی ضرورت ہے اورثالثی کرنے والے اورصلح صفائی کرانے والے کوبھی تقویٰ کی ضرورت ہے تاکہ وہ جنبہ داری نہ برتے،فیصلہ کرتے وقت اللہ کا لحاظ اوراس کا ڈرہو۔
مجموعی اعتبار سے اس تقویٰ کے نتیجہ میں جب میل ملاپ کا ماحول بنے گا، ایک دوسرے کا خیال ہوگاتویہ چیزیں بھی رحمت الٰہی کو متوجہ کرنے والی ہیں ۔

عالمی اخوت اسلامی کی یہ دعوت ہی نہیں بلکہ حقیقت ایمان کا یہ نتیجہ ہے جس کوآیت شریفہ میں بیان کردیاگیا ہے، اوریہ نتیجہ تب ہی ظاہر ہوگا جب ایمان اورایمان کے تقاضوں کو سمجھ کر ان پرعمل کا جذبہ ہوگا، جب مومن اپنے مومن بھائی کے لیے وہی پسند کرے گا جواپنے لیے پسند کرتا ہے، جب وہ اپنے مومن بھائی کو نہ رسوا کرے گا نہ اس کو بے یارومددگار چھوڑے گا، بلکہ اگر ضرورت پڑے گی تواس کے لیے سِپَر بن جائے گا، یہ ہے وہ ایمانی اخوت کا مضبوط تررشتہ جس کے نتیجہ میں ایک صحابی نے جان دے دی لیکن اپنے پیاسے ایمانی بھائی سے پہلے خود پانی پینا گوارہ نہ کیا۔5

(جاری ہے، ان شاء اللہ)

٭٭٭٭٭