سینتیسویں وجہ: بد نگاہی

اللہ سبحانہ وتعالی نے غض بصر کا حکم دیا ہے ۔ اللہ کا فرمان ہے:

اور صحیحین کی حدیث ہے کہ رسول اللہ ﷺ نے فرمایا:

”آنکھ بھی زنا کرتی ہے اور اس کا زنا بری نظر ہے۔“

شیخ الاسلام ابن تیمیہ ﷫ اپنے فتاوی میں فرماتے ہیں:

”بدنگاہی اور بوس و کنار کے چھوٹے گناہ (لمم) قابل مغفرت ہیں اگر کبائر سے بچا جائے۔ لیکن اگر بدنگاہی یا بوس و کنار پر اصرار ہوا تو وہ کبیرہ گناہ بن جاتا ہے۔ یہاں تک کہ اِن پر اصرار بسا اوقات فحاشی سے زیادہ خطرناک ہو جاتا ہے۔ شہوت سے دیکھنا اور ساتھ میں عشق معاشقے اور بوس و کنار کے جو کام ہوتے ہیں ان کی برائی اس زنا سے بہت زیادہ ہے جس پر اصرار نہ ہو۔ اسی لیے فقہاء ثقہ گواہ کے بارے میں فرماتے ہیں کہ نہ اس نے کبیرہ گناہ کیا ہو اور نہ صغیرہ گناہ پر اصرار کرے۔ بلکہ بری نظر اور بوس و کنار سے انسان شرک تک جا پہنچتا ہے۔ جیسے کہ اللہ تعالی نے فرمایا:

اسی لیے تصویر سے عشق صرف اسی صورت میں ہوتا ہے جب اللہ کی محبت اور ایمان کمزور ہو جائیں۔ اللہ تعالیٰ نے اس کا ذکر عزیز مصر کی مشرک بیوی اور لوط علیہ السلام کی مشرک قوم کے بارے میں کیا ہے۔“

ابن القیم ﷫ ’روضۃ المحبین‘ میں فرماتے ہیں:

”اللہ تعالی نے آنکھ کو دل کا آئینہ بنایا ہے۔ جب بندہ اپنی نگاہ نیچے رکھتا ہے تو دل شہوت اور برے ارادے سے باز رہتا ہے۔ اور جب شخص اپنی نظر کو آزاد چھوڑتا ہے تو دل شہوت کو آزاد کر دیتا ہے۔“

آگے فرمایا:

”جب نظر دل پر اثر کر جائے تو محتاط اور پختہ ارادے والا شخص اگر جلدی کرے اور آغاز میں ہی اس کے سبب کو ختم کر دے تو اس کا علاج آسان ہوتا ہے۔ لیکن اگر بار بار دیکھے اور شکل و صورت کے حسن کو اپنی آنکھوں سے ٹٹولتا رہے اور پھر اپنے دل میں بو دے۔ تو محبت کا درخت دل میں اتنا بڑھ جاتا ہے کہ پورا دل خراب کر دیتا ہے۔ اور دل اس فکر سے دور ہو جاتا ہے جس پر سوچ و بچار کا اسے حکم ہے۔پھر یہ دل انسان کو آزمائش کی طرف لے جاتا ہے۔ اور حرام کے ارتکاب پر مجبور کرتا ہے اور فتنے میں ڈال دیتا ہے۔ “

شیخ الاسلام ابن تیمیہ حرام شہوت کے انجام بد کے بارے میں فرماتے ہیں:

”جس کا دل حرام تصویر کی پوجا کرنے لگے، عورت کی ہو یا لڑکے کی، تو یہ وہ عذاب ہے جس کے برابر کوئی اور نہیں ۔ یہ لوگ سب سے زیادہ عذاب کے مستحق اور سب سے کم ثواب کمانے والے ہیں۔ جب عاشق کا دل تصویر سے لگا رہے اور وہ اس کا غلام بن جائے، تو اس کے لیے شر اور فساد کی اتنی اقسام و انواع اکٹھی ہوجاتی ہیں جنہیں صرف اللہ ہی جانتا ہے۔ سب سے بڑی آفت دل کا اللہ کی یاد سے غافل ہو جانا ہے۔ کیونکہ جب دل اللہ تعالیٰ کی عبادت اور خالص اس کے لیے ہو جانے کا ایک دفعہ مزہ چکھ لے تو اس سے بڑھ کر اسے کوئی اور چیز میٹھی، لذیذ اور بھلی نہیں لگ سکتی۔“

امام ابن کثیر ’البدایہ والنہایہ‘ میں 279 ھ کے واقعات کے بارے میں لکھتے ہیں:

”اِس سال عبدہ بن عبد الرحیم بھی فوت ہوا۔ اللہ اسے رسوا کرے ۔ ابن الجوزی نے ذکر کیا کہ یہ شخص سلطنت روم کے علاقوں میں خوب جہاد کرنے والا تھا۔ کسی جنگ میں مسلمانوں نے ایک شہر کا محاصرہ کر رکھا تھا۔ اس شخص کو شہر کے قلعے میں ایک رومی عورت نظر آئی اور وہ اس پر عاشق ہو گیا۔ اس نے عورت کو خط بھیجا کہ تم تک پہنچنے کا کیا راستہ ہے؟ اس نے جواب دیا کہ عیسائی بن جاؤ اور قلعہ تک چڑھ آؤ۔ اس شخص نے بات مان لی۔ اور مسلمانوں کا خیال کیے بغیر اس عورت تک پہنچ گیا۔ مسلمانوں کو بہت دکھ ہوا اور ان پر یہ بات بہت گراں گزری۔ کچھ عرصے بعد مسلمانوں کا گزر اس قلعے پر ہوا تو یہ شخص وہاں اس عورت کے ساتھ ملا۔ مسلمانوں نے کہا اے فلاں! تمہارے قرآن کا کیا ہوا؟ تمہارے علم کا کیا ہوا؟ تمہارے روزے کا کیا ہوا؟ تمہارے جہاد کا کیا ہوا؟ تمہاری نماز کا کیا ہوا؟ تو اس نے کہا سنو! میں پورا قرآن بھول گیا ہوں ما سوائے اس آیت کے:

اور اب تو مجھے اِن سے دولت اور اولاد بھی حاصل ہو گئی ہے۔ “

امام قرطبی ﷫ ’التذکرہ‘ میں فرماتے ہیں:

”مصر میں ایک شخص اذان اور نماز کے لیے باقاعدگی سے ایک مسجد آتا جاتا تھا۔ اس پر عبادت کا حسن اور اطاعت کا نور نظر آتا تھا۔ ایک دن اپنی عادت کے مطابق اذان دینے منارے پر چڑھا۔ منارے کے نیچے ایک ذمی عیسائی کا گھر تھا۔ اس کی نگاہ نیچے پڑی تو اسے گھر والے کی بیٹی نظر آئی۔ وہ اس کے فتنے میں مبتلا ہو گیا اور اذان چھوڑ دی۔ نیچے اترا اور اس کے گھر جا پہنچا۔ لڑکی نے کہا : کیا بات ہے تمہیں کیا چاہیے؟ اس نے کہا: مجھے تمہاری ضرورت ہے۔ لڑکی نے کہا: بھلا کیوں؟ جواب دیا کہ تو نے میری عقل چرا لی اور میرے دل پر غالب ہو گئی۔ لڑکی نے کہا: میں مشکوک بات نہیں مانوں گی۔ اس شخص نے کہا: تو میں تم سے شادی کر لیتا ہوں۔ لڑکی نے کہا: تم تو مسلمان ہو اور میں عیسائی۔ میرے والد تم سے کبھی بھی میری شادی نہیں کرائیں گے۔ اس نے کہا: تو میں عیسائی بن جاتا ہوں۔ لڑکی نے کہا: اگر تم ہو گئے تو میں کر لوں گی۔ چنانچہ شادی کی خاطر وہ عیسائی ہوگیا اور اُنہی کے ساتھ گھر میں رہنے لگا۔ اسی دن وہ گھر کی چھت پر چڑھا اور وہاں سے گر کر مر گیا۔ تو دیکھو کیسے اپنا دین بھی گنوایا اور عورت بھی نصیب نہ ہوئی۔ اللہ کی پناہ والعیاذ باللہ انجام بد اور برے خاتمے سے۔“

’ذم الہوی‘ میں ابو الفرج ابن الجوزی ﷫ فرماتے ہیں:

”بغداد میں ایک شخص کے بارے میں مجھے خبر پہنچی جسے ’صالح مؤذن‘ کہا جاتا تھا۔ چالیس سال تک اذان دیتا رہا۔ اس کی نیکی مشہور تھی۔ ایک دن اذان دینے منارے پر چڑھاتو اس کی نظر ایک عیسائی کی بیٹی پر پڑی جس کا گھر مسجد کے ساتھ تھا۔ یہ شخص اس لڑکی کے فتنے میں پڑ گیا۔ گھر جا کر دروازہ کھٹکھٹایا۔ لڑکی نے کہا: کون؟ جواب دیا: صالح مؤذن ہوں۔ لڑکی نے دروازہ کھول دیا۔ اس نے داخل ہوتے ہی لڑکی کو گلے لگائے۔ لڑکی بولی: تم لوگ تو امانتوں کے رکھوالے ہو یہ کیسی خیانت کر رہے ہو؟ اس نے کہا: جو میں چاہتا ہوں یا اس پر راضی ہو جاؤ اور یا میں تمہیں قتل کر دوں گا۔ اس نے کہا: نہیں! البتہ اگر تم اپنے دین سے پھر جاؤ تو ممکن ہے۔ اس شخص نے کہا: میں اسلام اور محمد (ﷺ) جو لائے ہیں اس سے بری ہوں۔ پھر وہ لڑکی کے نزدیک ہوا۔ لڑکی نے کہا: تم نے تو یہ اس لیے کہہ دیا کہ اپنا مقصد پورا کر لو اور پھر دوبارہ مسلمان ہو جاؤ۔ اگر سچے ہو تو سور کا گوشت کھاؤ۔ اس شخص نے سور کا گوشت کھا لیا۔ لڑکی نے کہا: تو پھر شراب بھی پی لو۔ اس نے شراب بھی پی لی۔ جب نشہ چڑھ گیا اور وہ لڑکی سے قریب ہوا تو لڑکی ایک کمرے میں چلی گئی اور دروازہ بند کر دیا۔ اور اس سے کہا: تم چھت پر چڑھ جاؤ جب میرے ابو آئیں گے تو میری شادی تم سے کر دیں گے۔ یہ شخص چھت پر چڑھا اور گر کر مر گیا۔ لڑکی نے نکل کر اسے ایک کپڑے میں لپیٹ دیا۔ اس کے والد آئے تو اس نے پوری کہانی سنائی۔ اس کے والد نے راتوں رات اسے نکال کر راستے میں پھینک ڈالا۔ جب اس کی خبر پھیلی تو اسے کوڑے میں پھینک دیا گیا۔“

٭٭٭٭٭