امر بالمعروف اور نہی عن المنکر

نیک کاموں کا حکم دینا اور برے کاموں سے روکنا ہمیشہ سے مسلمانوں کی ذمہ داری رہی ہے۔

اللہ تعالیٰ قرآن کریم میں ارشاد فرماتا ہے:

ان الہی ارشادات کو دیکھتے ہوئے ملا محمد عمر مجاہد نے امر بالمعروف اور نہی عن المنکر کو اپنی تحریک کی اہم ذمہ داریوںمیں سے قراردیا۔ طالبان تحریک نے ابتدا ہی سے سیار گروپ کے نام سے ایک خاص مجموعہ تشکیل دیا، جو امر بالمعروف اور نہی عن المنکر کا فریضہ سرانجام دیتا۔ مذکورہ مجموعہ کے افراد نے مفتوحہ علاقوں میں نہ صرف خانگی سطح پر بلکہ عمومی شاہراہوں، مساجد، مدارس اور عوامی مقامات پر امر بالمعروف اور نہی عن المنکر کے فرائض ادا کیے۔

طالبان نے اپنا مقدس جہاد شروع کرنے کے چند ماہ بعد ہی ۱۷ ذوالقعدہ ۱۴۱۵ھ بمطابق ۱۸ اپریل ۱۹۹۵ء کوملا محمد عمر مجاہد صاحب کے خصوصی فرمان کے مطابق اس مجموعے کو محکمہ امر بالمعروف میں تبدیل کردیا اور مولوی محمد ولی صاحب کو اس محکمے کا مسئول مقرر کیا، یہ محکمہ فتحِ کابل کے بعد مستقل وزارت میں بدل دیا گیا۔

جیسا کہ سب کے علم میں ہے کہ افغانستان کے تمام اہلِ سنت حضرات حنفی مذہب کے پیروکار اور امامِ اعظم ابو حنیفہ رحمہ اللہ کے مقلد ہیں، ملا صاحب نے بھی حنفی مذہب پر سختی سے کاربند ہونے کی وجہ سے غیر مذہبی تنظیموں اور جماعتوں کے نظریات اور سرگرمیوں پر پابندی لگادی تھی، اسی طرح وہ افغان معاشرے میں رائج غیر شرعی رسومات، خرافات اور بدعات سے بھی روکتے تھے۔

شرعی حجاب کی ترویج اور اختلاط کی روک تھام

عالمِ اسلام پر ایک لمبے عرصے سے ایسے نظام مسلط کیے گئے ہیں جو اسلامی احکامات کی تبلیغ، ترویج اور ان پر عمل پیرا ہونے کو درخورد اعتنا نہیں گردانتے، دیگر اسلامی احکام کے ساتھ ساتھ ایک اہم فریضہ جسے اسلامی معاشروں میں ترک کردیا گیا ہے، وہ شرعی حجاب ہے۔

افغانستان میں بادشاہی نظام کے وقت سے ہی حجاب ترک کرنے اور مرد وزن کے مابین حکومتی، تعلیمی اور دیگر اداروں میں اختلاط عام تھا، جس کے برے اثرات معاشرے میں پھیل رہے تھے، یہاں تک کہ اکثر شہروں میں مسلمان خواتین شرعی حجاب کا اہتمام نہیں کرتی تھیں اور سرکاری اداروں میں مردوں کے ساتھ اختلاط ایک معمول بن چکا تھا۔

اللہ تعالیٰ قرآن کریم میں فرماتے ہیں:

طالبان نے شہروں پر تسلط حاصل کرنے کے بعد تمام خواتین پر شرعی حجاب کی پابندی اور مرد و زن کے مابین اختلاط کو ممنوع قراردیا اور تعلیمی وسرکاری اداروں میں خواتین کی غیر ضروری آمد ورفت پر وقتی طور پر پابندی لگادی، تا آنکہ ایک ایسا منظم نظام متعارف کروا لیا جائے جس میں خواتین اختلاط اور بے پردگی سے بچتے ہوئے اپنی تعلیم اور ضروری کام سرانجام دے سکیں۔

افغانستان کی تمام خواتین نے ان احکامات کا خیر مقدم کیا اور انہیں اپنی عزت اور وقار کا ذریعہ سمجھا، لیکن بین الاقوامی اسلام دشمن قوتوں نے شرعی پردے جیسے اسلامی حکم کی شدید مذمت کی اور پروپیگنڈا جنگ کے ساتھ ساتھ سیاسی دباؤ بھی بڑھانے لگے، یہاں تک کہ ایک بار ہرات شہر میں خواتین کا ایک احتجاجی مظاہرہ بھی ترتیب دیا۔ اس سب کے باوجود ملا صاحب نے شرعی احکامات کی تطبیق میں ذرّہ بھر تساہل اور تنازل سے کام نہیں لیا۔

دیگر سرگرمیاں اور ادارہ جاتی اقدامات

نظام میں تبدیلیوں اور اداروں کی سرگرمیوں کے آغاز کے بعد مجموعی طور پر عمرانی اور انتظامی اقدامات عمل میں لائے گئے۔ اس کے بعد طالبان نے افغانستان میں بے شمار اصلاحات متعارف کرائیں۔ اس حوالے سے طالبان کا اہم مقصد بیت المال، قومی اثاثوں اور وسائل کو محفوظ کرنا تھا۔ طالبان نے قندھار اور دیگر صوبوں میں فعال اور غیر فعال جنگی وسائل جیسے ٹینک، ہیلی کاپٹر، توپ خانے اور دیگر وسائل کو جمع کرکے محفوظ مقامات پر منتقل کیا۔ سرکاری اسباب، تعمیرات اور وہ تمام گھر جو مختلف لوگوں کے قبضے میں تھے، واگزار کروا کر حکومتی دسترس میں دے دیے گئے۔قندھار شہر اور دیگر علاقوں میں بہت سے لوگوں نے سرکاری زمینوں پر گھر تعمیر کیے تھے، اسی طرح عام شاہراہوں کے درمیان دکانیں اور مارکیٹیں تعمیر کی تھیں، عام راستوں میں پھاٹک لگائے ہوئے تھے۔ قندھار بلدیہ نے تمام راستے کھول دیےاور ناجائز تعمیرات اور دکانوں کو منہدم کرڈالا۔

عمرانی شعبے میں بھی قابلِ ذکر اقدامات اٹھائے گئے، طالبان نے موسمِ سرما کے شروع میں صوبہ ہلمند پر قبضہ کیا اور ایک ماہ کے اندر اندر وہاں موجود بُست کی فیکٹریوں کو پھر سے فعال کر دیا اور وہاں کپاس کی پروسیسنگ کے علاوہ گھی، صابن اور چارے کی تیاری شروع کردی گئی۔

شہری ترقیاتی امور کے حوالے سے طالبان کی زیادہ توجہ مساجد اور دینی مدارس تعمیر کرنے پر تھی، اس سے پہلے پورے افغانستان میں گنتی کے چند مدارس تھے، خانہ جنگی کے دوران ان کی عمارتوں کو بھی نقصان پہنچا تھا، طالبان نے شہروں، دیہاتوں اور اضلاع میں مساجد اور مدارس تعمیر کیے، تاکہ نوجوان نسل کی عملی وفکری تربیت ہوسکے۔

انقلاب کے انہی ابتدائی ایام میں طالبان کی جانب سے شرعی اصلاحات اور رفاہی امور پر بھرپور توجہ سے ظاہر ہوا کہ یہ لوگ اپنے دعوؤں کو عملی جامہ پہنانے والے اور ملک وملت کے لیے کتنے خیرخواہ ہیں۔

مرکزی دارالافتاء کا قیام

امارتِ اسلامی کے تمام اقدامات شریعت کے مطابق سرانجام دینے کے لیے ایک معتبر دینی وعلمی مرجع کی ضروت تھی، جو تمام مسائل و معاملات میں امارتِ اسلامی کے امیر اور دیگر تمام مسؤلین کی رہنمائی کرسکے۔

اس مقصد کے لیے ملا محمد عمر مجاہد نے قندھار میں مرکزی دارالافتاء کے نام سے ایک ادارے کی بنیاد رکھی، جو فقہ حنفی کی تعلیمات کے مطابق امارتِ اسلامیہ کے تمام اقدامات کو میزانِ شریعت میں جانچے، اس ادارے نے اگرچہ ابتدا ہی سے کام شروع کردیا تھا، لیکن ۱۹۹۶ء میں ملا صاحب نے اس پر خصوصی توجہ دے کر جلیل القدر علمائے کرام اور مشائخ عظام کے مشورے سے اس ادارے کے لیے افرادِ کار کی نئی تشکیل ترتیب دی۔

امارتِ اسلامی کے قاضی القضاۃ مولوی نور محمد ثاقب جو کچھ وقت کے لیے مرکزی دار الافتاء کے رئیس بھی رہے، فرماتے ہیں:

’’سرطان ۱۳۷۵ ھ ش (بمطابق جولائی ۱۹۹۶ء) میں تحریکِ اسلامی طالبان کے امیر کی جانب سے ہم چھ علماء، مولوی نور محمد ثاقب، مولوی حاجی محمد صادق، مولوی محمد نعیم اخندزاده، مولوی فضل الرحمن، مولوی شہاب الدین دلاور اور مولوی مسلم حقانی، کو قندہار بلایاگیا۔ وہاں پہنچ کر پہلے تحریک کے رہنماؤں ملا محمد ربانی(حاجی معاون صاحب)، حاجی ملا محمد حسن اخوند، مولوی احسان اللہ احسان اور دیگر حضرات سے مجلس ہوئی، اس مجلس میں ابتدائی باتیں ہوئیں، پھر طالبان کی عالی شوری کے ارکان نے کہا کہ ہم نے دیگر علماء جیسے شیخ الحدیث عبدالعلی دیوبندی، مولوی خواص اور دیگر حضرات کو بھی مدعو کیا ہے، لہذا تفصیلی مجلس بعد میں کریں گے۔

دو دن بعد دوبارہ مجلس منعقد ہوئی، اس میں علماء کی مرکزی شوری کے رئیس مولوی عبدالغفور(سنانی) اور دیگر بڑے علماء نے شرکت کی، مجلس میں قضائی(عدالتی) معاملات اور دارالافتاء کے حوالے سے بحث ہوئی، اس مجلس میں بندہ مولوی نور محمد ثاقب کو مرکزی دارالافتاء کا رئیس اور مولوی خلیل اللہ زرمتی کو عدالت عالیہ تمیز کا رئیس مقرر کیا گیا، اس کے بعد دارالافتاء اور قضائی امور سے متعلق امیرالمؤمنین سے بھی ملاقات ہوئی۔‘‘

مرکزی دارالافتاء کے کئی اراکین تھے، جیسے شیخ الحدیث مولوی عبدالحکیم حقانی(قندھار) مولوی عبداللہ عرف خطیب صاحب(ارزگان)، مولوی حمداللہ اخندزادہ(دائی چوپان)، مولوی محمد خواص(ہلمند، کجکئی) مولوی رحیم جان آغا(میدان وردگ، سید آباد)، مولوی مسلم حقانی(بغلان)، مولوی عبدالقدیم اخندزادہ(میدان وردگ)، ان کے علاوہ دیگر علماء بھی دارالافتاء کے اراکین میں شامل تھے۔

مرکزی دارالافتاء میں عمومًا درج ذیل افراد اور اداروں سے استفتاءات اور سوالات بھیجے جاتے تھے:

1. افغانستان کے عام عوام
2. مختلف حکومتی ادارے
3. عدالتی محکموں اور قاضیوں کی جانب سے، تاکہ وہ اپنے فیصلوں میں فقہی مسائل کو واضح کرسکیں
4. امیر المومنین

مذکورہ دارالافتاء میں امارتِ اسلامیہ سے متعلق تمام اہم مسائل کے علاوہ عام عوام کے بہت سے مسائل اور استفتاءات کا جواب دیا جاتا، اسی طرح ابتدا میں رمضان اور عیدین کا اعلان بھی دارالافتاء کی ذمہ داری تھی۔ مرکزی دارالافتاء کی طرف سے پورے افغانستان کے خطباء کے لیے ایک جامع خطبہ بھی تیار کیا گیا تھا۔

اس وقت مرکزی دارالافتاء نے کافی فتاویٰ بھی صادر کیے تھے، جو (بدرالفتاوی ٰفی الفقہ الحنفی) کے نام سے پانچ جلدوں میں ترتیب دیے گئے۔ اب تک تین جلدیں چھپ چکی ہیں، باقی چوتھی اور پانچویں جلد کی ترتیب اور کمپوزنگ کا کام مکمل ہوچکا ہے، جو جلد ہی چھپ جائے گی۔

ان فتاویٰ میں اہم، ضروری اور مفید علمی مسائل کو کافی دقت، غور و خوض اور تفصیل سے معتبر کتابوں کے حوالوں سے مزین کرکے حل کیا گیا ہے۔ یہ وہ مسائل ہیں، جو روزمرہ زندگی سے متعلق ہیں، جس طرح اس وقت یہ مسائل پیش آئے تھے، ویسے ہی آج بھی ان کی ضرورت ہے اور آئندہ بھی رہے گی۔

امارتِ اسلامی اور امیرالمومنین

انسان روئے زمین پر اللہ تعالیٰ کا خلیفہ ہونے کی وجہ سے اس بات کا مکلف ہے کہ وہ زمین پر اللہ تعالیٰ کے احکامات اور شعائرِ دین کے قیام و نفاذ کے لیے اسلامی نظام نافذ کرے۔

قرآن کریم کی آیات، نبوی ارشادات اور صحابہ کرام کے اجماع سے علمائےکرام کا اس بات پر اتفاق ہے کہ تمام مسلمانوں پر فرض کفایہ ہے کہ وہ اپنے لیے امام المسلمین یا امیر منتخب کریں، اسلامی نظام کا نفاذ کریں، اور اگر اس حوالے سے کوئی بھی مسلمان کوشش نہ کرے تو تمام مسلمان اس فریضے کے ترک کرنے کی وجہ سے گناہ گار ہوں گے۔

اللہ تعالی کا فرمان ہے:

دوسری جگہ فرمایا:

رسول اللہ صلی اللہ علیہ وسلم نے فرمایا:

امام غزالی، علامہ ابن خلدون، علامہ شہرستانی، علامہ ماوردی، علامہ ابن حجرھیتمی، امام نووی، علامہ شاہ ولی اللہ اور دیگر متقدمین علمائے کرام رحمہم اللہ نے تصریح کی ہے کہ اسلامی نظام کا نفاذ اور امام کی تقرری ایک اہم شرعی فریضہ ہے۔

اگرچہ خلافت راشدہ کے بعد بہت کم لوگ ہی حقیقی خلافت کے مستحق ہوئے ہیں(اس کے باوجود انہیں مسلمانوں کا امیر اور مسئول مانا گیا)، لیکن بعد کی صدیوں میں عثمانی سلطنت ہی وہ واحد مرجع تھی، جو اسلام کے دفاع اور احکام اسلام کے نفاذ میں پیش پیش رہی، اسی وجہ سے اسے خلافت عثمانیہ جیسے عظیم لقب وعنوان سے پکارا جاتاہے۔

تقریبا ایک صدی پہلے خلافتِ عثمانیہ کے سقوط کے بعد مسلمانانِ عالم اسلامی نظامِ حکومت سے محروم ہوگئے، اس کے بعد پورا عالمِ اسلام مغربی استعمار کے شکنجے میں چلا گیا اور مشرق و مغرب کے کفار نے مسلمان معاشروں کے عقائد، افکار، تہذیب و ثقافت، سیاست اور اجتماعی و معاشرتی اقدار میں اپنا زہر انڈیلنے کی کوششیں شروع کردیں، جس کے نتیجے میں مسلمان معاشرے اپنے دینی اصول واقدار سے دورہوگئے، اس ہمہ جہت شکست وریخت اور مغربی رنگ میں رنگنے کے بعد ہماری سیاست اور امارت بھی بری طرح متاثر ہوئی، اس سے قبل مسلمانوں کی قیادت و حکومت شرعی امراء اور اسلامی حکومتوں کے ہاتھوں میں ہوتی، شکست کے بعد مسلمانوں نے مغرب کی تقلید میں (ریاست + قوم) کے نظریے کی بنیاد پر قوم پرستانہ، اشتراکیت پسند، لادین یا پھر مغربی طرز کے بدعتی جمہوری نظام ہائے سیاسی قبول کرلیے، جس کے نتیجے میں نہ صرف اسلام کی تشریعی وتقنینی حیثیت ختم کردی گئی بلکہ متحدہ اسلامی امت کے ٹکڑے ٹکڑے ہوئے اور اسلامی سیاست و حکومت عملی میدان سے بے دخل کردی گئی۔

خلافتِ عثمانیہ کے سقوط کے بعد بیسویں صدی عیسوی میں اسلامی سیاسی حاکمیت کے اعادے کے لیے عالمِ اسلام کے مختلف ممالک میں سیاسی اور جہادی تحریکیں شروع ہوئیں، فکری اور دعوتی جماعتوں کی تشکیل عمل میں لائی گئیں، عوامی جدوجہد ہوئی، کچھ ممالک میں انتخابات کے ذریعے اسلامی نظام کے نفاذ کے لیے کوششیں ہوئیں، اور دعوت و تبلیغ سے منسلک بعض افراد نے اصلاحِ افراد کے ذریعے اسلامی انقلاب کے لیے لمبے عرصے کی پلاننگ کی اور اس میں جُت گئے۔

باوجود یہ کہ یہ تمام تر کوششیں اسلامی تاریخ کے روشن جھروکے ہیں اور مسلمانوں کی اسلامی نظام سے محبت و عقیدت کا مظہر ہیں، لیکن افسوس کا مقام یہ تھا یہ سب کوششیں اور جدوجہد صرف کوششیں ہی رہیں، یہ تمام تر مجاہدے نظری وفکری ہی رہے، عمل کی دنیا میں ان کا کوئی نام ونشان نہ تھا، انہیں کوئی عملی جامہ نہ پہناسکا، اس حوالے سے شاید ملا محمد عمر مجاہد ہی وہ شخصیت ہیں، جن پر اللہ کا خصوصی فضل واحسان ہوا کہ انہوں نے اسلامی نظام کو فکر و نظر کے بجائے عملی طور پر نافذ کیا۔ خلافتِ عثمانیہ کے سقوط کے بعد بیسویں صدی عیسوی کے دسویں عشرے اور پندرہویں صدی ہجری کے دوسرے عشرے میں اسلامی نظام کے سرنگوں پرچم کو دوبارہ لہرایا اور پوری دنیا کے سامنے ایک بار پھر اسلامی حکومت اور شریعت کے نفاذ کا عملی نمونہ دکھادیا۔

(جاری ہے، ان شاء اللہ)

٭٭٭٭٭