­گیارھو یں فصل

محمود کی رہائی کا وقت قریب آ رہا تھا، میری ماں نے اس کے استقبال اور اس کی انجنیئرنگ کی ڈگری حاصل کرنے کی دوبارہ خوشی منانے کی تیاری شروع کر دی تھی، ہم نے گھر کو چونے سے رنگ دیا، اور حلوہ ، بسبوسہ¹بسبوسہ ایک مشہور عربی میٹھا ہے جو عام طور پر سمولینا (سویدا) کے آٹے، چینی، دہی، اور گری دار میوے سے تیار کیا جاتا ہے۔ اور دیگر قسم کی کھانے کی چیزیں تیار کیں، ہم نے دوبارہ ان منصوبوں اور امیدوں کے بارے میں بات کرنا شروع کر دی جو ہم نے اس کے مصر سے واپسی پر کی تھیں۔

رہائی کے دن ہم سب اپنی مکمل تیاریاں کر کے سرائے کے دروازے کے سامنے کھڑے ہوگئے، دوپہر کے وقت وہ سرائے کے دروازے سے نکلا، جب اس نے ہمیں دیکھا تو ہماری طرف دوڑا اور ہم اس کی طرف دوڑے اور ہم نے اسے گلے لگا لیا اور شکر کی دعائیں پڑھنے لگے، حسب معمول میری ماں دیر سے پہنچی، محمود اس کے پاس پہنچا اور اس کا سر اور ہاتھ چومنے لگا اور وہ اسے روکنے کی کوشش کرتے ہوئے کہنے لگی ’’نہیں، چیف انجینئر‘‘ پھر ہم گھر کی طرف روانہ ہوئے اور ہمارے سر فخر سے بلند تھے، جب بھی ہم کسی جاننے والے کے پاس سے گزرتے، وہ جلدی سے کھڑا ہوجاتا یا ہماری طرف متوجہ ہو جاتا اور ہمیں مبارکباد دیتا، محمود کو گلے لگاتا اور کہتا ’’الحمدللہ، چیف انجینئر، آپ کی سلامتی پر شکر ہے‘‘، جب ہم محلے کے کنارے پہنچے تو وہاں سب ہمارے انتظار میں تھے اور محمود کا استقبال فاتحین کی طرح کیا گیا، خوشیاں اور تقریبات کئی دن تک جاری رہیں اور مبارکباد دینے والے آتے رہے۔

جب ہماری خوشیاں محمود کی قید سے رہائی کے بعد ختم ہوئیں، تو ہم نے اس کی ملازمت کی خوشیوں کا جشن منانا شروع کیا۔ اس نے (UNRWA)ایجنسی کے دفتر جانا شروع کیا اور مختلف منصوبوں میں بطور عماراتی انسپکٹر اور سول انجینئر کام کرنے لگا، یہ واضح تھا کہ لمبے عرصے کے بعد ہمارے لیے آسمان کے دروازے کھل گئے تھے، کیونکہ ایجنسی کی نوکری میں بہت عمدہ تنخواہ ملتی تھی۔ جب ہماری خوشیاں محمود کی ملازمت کے بعد ختم ہوئیں، تو ایک نئی خوشی شروع ہوئی، میری بہن فاطمہ کی منگنی محمود کے ایک ساتھی سے ہوئی اور پھر شادی کی تیاریاں شروع ہوئیں۔ فاطمہ کے شادی کے دن، جب وہ اپنے شوہر کے گھر منتقل ہوگئی اور ہم شادی کی تقریب سے واپس آئے، تو ہمیں لگا کہ گھر کا ایک ستون گرگیا ہے۔ فاطمہ نے ہمارے گھر کو بھرا ہوا تھا، بلکہ مجھے ذاتی طور پر لگا کہ میرا دل میرے سینے سے باہر نکل گیا ہے۔ لیکن وقت کے ساتھ ہم اس کے عادی ہوگئے، خاص طور پر جب ہمیں معلوم ہوا کہ وہ اپنے گھر میں خوش ہے۔ تھوڑی ہی مدت بعد ہمارے پڑوسی، ام العبد کے بیٹے عبدالحفیظ کو بھی رہا کر دیا گیا، جو کہ الجبهة الشعبية سے تعلق رکھنے اور کام کرنے کے الزام میں قید تھا۔ محلے نے اس کا بھی محمود کی طرح گرم جوشی سے استقبال کیا اور اس کی ماں، ام العبد نے بھی اس کی رہائی کی خوشی میں مٹھائیاں تیار کیں۔

میرے بھائی محمود کا اور عبد الحفیظ کا استقبال بہت ہی عجیب تھا۔ ایک طرف تو ان میں بہت ہی دوستانہ تھا کیونکہ وہ دونوں جیل میں ایک ساتھ رہے تھے، اور انہوں نے ایک ساتھ بھوک ہڑتالیں اور مشکلات کا سامنا کیا تھا، جس کی وجہ سے وہ گہرے دوست بن گئے تھے۔ دوسری طرف ان کے درمیان ایک شدید کشمکش بھی واضح تھی، کیونکہ جب بھی سیاسی اور فکری معاملات پر بات ہوتی تھی تو وہ جلد ہی ایک دوسرے پر تنقید کرنے لگتے تھے۔ محمود کی نوکری کے چند مہینوں بعد میری ماں نے اصرار کیا کہ ہم اپنے منصوبے شروع کریں اور ایک نیا کمرہ بنائیں جو چیف انجینئر کے لائق ہو، اور جو اس کے دوستوں، ساتھیوں اور محلے کے نوجوانوں اور مردوں کی میزبانی کر سکے۔ ہم نے ایک مزدور کرائے پر لیا، ضروری مواد خریدا، اور ایک وسیع کمرہ بنایا جس کی دیواریں اونچی تھیں، چھت پر ایس بسٹوس (Asbestos) کی چادر تھی، اس میں کئی بڑی کھڑکیاں اور ایک بہترین لکڑی کا دروازہ تھا، اور اس کا فرش اونچا اور سیمنٹ کا تھا۔

اس کے بعد میری ماں نے اصرار کیا کہ ہم ایک بستر خریدیں، وہ استعمال شدہ تھا لیکن ہمارے گھر میں ترقی کی دنیا میں ایک نئی بات تھی۔ محمود اس پر سوتا تھا اور کبھی کبھی ہم میں سے کوئی اس پر کچھ وقت کے لیے لیٹ جاتا تھا۔ پھر ہم نے ایک میز اور دو کرسیاں خریدیں، اور اس طرح گھر میں واضح ترقی ہونے لگی۔ پھر محمود کی شادی کے ارادوں کے بارے میں بات بڑھنے لگی اور میری ماں اس سے پوچھے لگی کہ کیا وہ کسی خاص لڑکی کوپسند کرتا ہے ؟ اور وہ اپنی دلہن میں کون کون سی خصوصیات چاہتا تھا؟ وغیرہ ۔

مقاومت کی شدت کم ہونے لگی تھی، کیونکہ بہت سے لوگوں کو گرفتار کر لیا گیا تھا، اور بہت سے شہید ہو گئے تھے، اور دنیا لوگوں کے لیے کھل گئی تھی اور انہیں مشغول کر دیا تھا۔ اس کے علاوہ اسرائیلی خفیہ ادارے نے مقاومت کے خلاف بڑی کامیابیاں حاصل کی تھی، جہاں انہوں نے بڑی مقدار میں اسلحہ اور گولہ بارود ضبط کیا تھا۔ ایسا لگتا تھا کہ ان کی معلومات اور فلسطینی حقیقت کی اطلاعات میں بہت زیادہ اضافہ ہوا تھا جس کی وجہ سے وہ مقاومت کو محدود اور پریشان کرنے میں کامیاب تھے۔ عوامی آزادی کی فوج بڑی حد تک کمزور ہونے لگی تھی، کیونکہ یہ ایک عسکری تنظیم تھی اور اس کا تنظیمی پہلو اور اس کی بیرونی حمایت نہیں تھی، اور اس کا وجود غزہ کے علاقے تک محدود تھا، مغربی کنارے میں نہیں تھا۔ وقت کے ساتھ ساتھ، اس نے فتح اور عوامی محاذ کی جگہ لینا شروع کر دی، بہت سے نوجوانوں کی گرفتاری اور قید کے بعد، جب ان کی سزائیں ختم ہوئیں اور انہیں رہا کیا گیا، تو فکری اور سیاسی رجحانات کا ابھار ہونے لگا، جس کے نتیجے میں ان نوجوانوں اور ان کے خاندانوں میں اور ان کے بند حلقوں میں شدید فکری اور سیاسی مباحثے ہونے لگے، اور واضح طور پر سننے میں آیا کہ کچھ لوگوں نے فتح کا نقطۂ نظر اپنایا اور اس کے خیالات پیش کیے، اور کچھ لوگوں نے الجبھۃ الشعبیۃ کا نقطۂ نظر اپنایا اور اس کے خیالات اور نظریات کو اپنایا۔

عبدالحفیظ اکثر ہمارے گھر آتا تھا، وہ اور دوسرے لوگ میرے بھائی محمود کے کمرے میں بیٹھتے تھے اور فکری مسائل پر گفتگو کرتے تھے۔ عبدالحفیظ مارکسی سوشلسٹ تھا اور اس فکر کی دعوت دیتا تھا، وہ جدلیاتی مادیت (Dialectic Materialism) سے متعلقہ مسائل پر بحث کرتا تھا، مارکس، لینن یا اینگر کی لکھی ہوئی کچھ کتابوں کا حوالہ دیتا تھا اور ہمارے عوام کی جدوجہد اور ان کے جائز حقوق کے لیے سوویت یونین کی حمایت اور سوشلسٹ ممالک کی حمایت کی بات کرتا تھا، وہ کہتا تھا کہ ہمیں ان دوستیوں اور حمایتوں کو استعمال کرنا چاہیے۔ محمود کا نقطۂ نظر مختلف تھا، اس کا خیال تھا کہ ہمارا قومی مسئلہ کسی بھی فکری دھارے میں تقسیم ہونے کا متحمل نہیں ہے، ہر کسی کو اپنی فکر اپنانے کی آزادی ہے، لیکن اہم یہ ہے کہ ہماری تمام کوششیں قومی متحدہ تحریک کے تحت مرکوز ہونی چاہئیں، جو تحریک فتح ہے، جس میں مذہبی اور سیکولر، کمیونسٹ، عیسائی اور مسلمان سب شامل ہیں اور فکری اختلافات کی گنجائش نہیں ہے۔ جب بھی وہ ہمارے گھر یا ام العبد کے گھر میں ملتے، یا سڑک کے کونے پر کھڑے ہوتے، تو یہ مباحثے شروع ہو جاتے اور آوازیں بلند ہو جاتیں، ہر کوئی اپنے موقف پر شدت سے بات کرتا اور کبھی کبھی بحث اتنی تیز ہوجاتی کہ جھگڑے کی شکل اختیار کر لیتی، لیکن آخر میں وہ چائے پیتے اور اپنے اپنے کاموں میں مشغول ہو جاتے۔

دوسری طرف، شیخ احمد نے کچھ نوجوانوں کو نماز کے لیے بلانا شروع کیا، اور وہ مسجد آنے لگے، نمازیں ادا کرتے، پھر ایک حلقے میں بیٹھ کر قرآن پڑھتے یا کسی دینی کتاب کا مطالعہ کرتے۔ شیخ احمد انہیں شرح و تفسیر سے سمجھاتے اور تربیت دیتے، نوجوان ان کی باتوں کو سمجھتے اور قبول کرتے، شیخ احمد ان نوجوانوں کو ہدایات دیتے اور وہ چلے جاتے، پھر نئے نوجوان مسجد آتے اور حلقہ بڑھتا جاتا۔

میرا بھائی حسن دل کا سب سے اچھا تھا اور دوسروں کی خاطر قربانی دینے کے لیے ہمیشہ تیار رہتا تھا۔ اس نے گھر کی ذمہ داری اور محمود کی تعلیم کے اخراجات اٹھائے، وہ سبزی کی دکان پر کام کرتا اور اپنی تعلیم جاری رکھتا، پھر اس نے صنعت کی تعلیم قبول کرلی۔ حالانکہ اس نے ثانوی تعلیم میں اعلیٰ نمبر حاصل کیے تھے، اگر اسے مناسب موقع ملتا تو وہ بھی انجینئرنگ یا سائنس کی تعلیم حاصل کر سکتا تھا، لیکن حالات سخت تھے، اس نے صنعت کی تعلیم قبول کر لی اور سبزی کی دکان کی ذمہ داری بھی سنبھالی وہ صنعت کی اسکول سے خراطہ اور برادہ کے شعبے²خراطہ (یعنی ٹرننگ) اور برادہ (یعنی ملنگ) دو اہم مشینی عمل ہیں جو مختلف دھاتوں اور دیگر مواد کی شکل اور سائز کو تبدیل کرنے کے لیے استعمال ہوتے ہیں۔ سے تقریباً فارغ التحصیل ہو چکا تھا۔

اپنے سبزی کے ٹھیلے پر کام کرتے ہوئے، حسن کی ملاقات شیخ احمد سے ہوئی جو کئی بار اپنے گھر کی ضروریات حسن سے خرید چکے تھے۔ شیخ احمد نے حسن کی خوش اخلاقی اور اعلیٰ اخلاق کو دیکھا اور اسے آخرت کی یاد دلاتے ہوئے اور اللہ کی نافرمانی اور اس کے حکم کی مخالفت کرنے کے خطرات سے آگاہ کرتے ہوئے اور اللہ کی نعمتوں میں جو اس کے پاس ہے طمع دلاتے ہوئے نماز پڑھنے اور مسجد آنے کی دعوت دی۔ شیخ احمد نے بتایا کہ دین کا راستہ اور اس پر استقامت سب سے بہترین راستہ ہے جو دنیا میں خوشی اور کامیابی، اور آخرت میں کامیابی اور فلاح کی جانب لے جاتا ہے۔ حسن کے دل میں شیخ احمد کی باتیں گھر کر گئیں اور اس نے شیخ سے وعدہ کیا کہ وہ نماز شروع کرے گا اور مسجد آئے گا۔ واقعی اسی شام حسن نے وضو کیا اور نماز پڑھنا شروع کر دی، اور جب بھی موقع ملتا مسجد جاتا، عام طور پر حسن مغرب کی نماز کے وقت مسجد جاتا اور عشاء کی نماز تک وہیں رہتا، عشاء کے بعد وہ گھر واپس آتا، گھر والوں کے لیے یہ بات بہت پسندیدہ تھی، خاص طور پر میری ماں کے لیے کیونکہ نماز پڑھنا اور مسجد جانا ایک پسندیدہ عمل تھا۔ حسن بڑا اور سمجھدار تھا اور اس کے بارے میں کوئی تشویش نہیں تھی۔ وہ کبھی کبھار میرے بھائی محمود اور ہمارے پڑوسی عبدالحفیظ اور دوسرے نوجوانوں کے درمیان ہونے والی بحثوں میں بھی حصہ لیتا، جہاں وہ عبدالحفیظ کے مقابلے میں بہت سخت ہوتا اور اسے الحاد، بے ایمانی اور کفر کے الزامات دیتا۔عبدالحفیظ کی فکری سطح حسن سے بہت بہتر تھی، شاید جیل میں گزارے وقت نے عبدالحفیظ کو یہ فکری مہارتیں فراہم کی تھیں، وہ دینی فکر پر حملہ کرتے ہوئے کہتا کہ دین لوگوں کے لیے ایک نشہ آور چیز ہے اور دیندار مزاحمت میں کہاں ہیں اور ان کا کردار اور قومی جدوجہد کیا ہے؟ حسن کمزور جوابات دیتا اور محمود کے ساتھ بھی ٹکراتا جہاں وہ دین کی طرف واپسی اور آزادی کی جدوجہد میں اس کی اہمیت پر زور دیتا۔ محمود مضبوط جواب دیتا کہ دین میں کوئی شک نہیں، لیکن ہمیں اس وقت قومی آزادی پر توجہ دینی چاہیے اور کسی فکری یا دینی اختلاف میں نہیں پڑنا چاہیے۔ حسن خاموش ہو جاتا اور کوئی جواب نہ دیتا، خاص طور پر جب محمود پوچھتا کہ ہمارے عیسائی بھائیوں کا کیا ہوگا؟ اور قومی جدوجہد میں ان کا کردار کیا ہوگا ؟ اگلے دن حسن مسجد سے چند کتابیں لے کر آیا جن میں سے ایک مارکسی فکر اور سوشلزم کے نظریات کو رد کرتی تھی، دوسری اسلام کے معاشی نظام پر تھی، اور تیسری عقیدہ پر مبنی تھی وہ انہیں اپنے پاس رکھ کر ورق پلٹنے اور گزشتہ بحث میں ناکام سوالات کے جوابات تلاش کرنے لگا۔

محمود نے حسن پر ہونے ظاہر والی تبدیلیوں پر تبصرہ کرنا شروع کر دیا اور کبھی کبھار اس سے مسجد اور اس میں ہونے والی سرگرمیوں کے بارے میں سوالات کرنے لگا۔ محمود نے حسن کو ان لوگوں سے دور رہنے کی نصیحت کی، لیکن جب حسن نے اس کی بات نہیں سنی، تو محمود نے ہماری ماں کے اثر و رسوخ کا استعمال کرتے ہوئے حسن کو ان لوگوں سے دور رکھنے کی کوشش کی۔ ہم اکثر ’’اخونجیہ‘‘ جیسا لفظ سنتے تھے، محمود کہتا تھا کہ شیخ احمد اور وہ لوگ جو مسجد میں آتے ہیں، دینی کتابیں پڑھتے اور بانٹتے ہیں، وہ اخونجیہ یعنی اخوان المسلمین کے ہیں۔ وہ اپنی ماں کو ڈراتا کہ حسن اخونجیہ نہ بن جائے کیونکہ اخونجیہ قومیت پر یقین نہیں رکھتے اور جمال عبد الناصر کے خلاف ہیں۔ انہوں نے اسے قتل کرنے کی کوشش کی تھی، حکومتیں بھی ان کے خلاف ہیں اور ان کا پیچھا کرتی ہیں۔ اور اگر حسن اخونجیہ بن گیا تو وہ بلاوجہ خطرے میں پڑ جائے گا۔

میری ماں حسن کو بلاتیں اور اس سے محمود کی باتوں کے بارے میں پوچھتیں، خصوصاً اخونجیہ کے بارے میں، حسن صاف انکار کرتا کہ وہ اخوان المسلمین کا حصہ نہیں ہے، نہ ہی مسجد میں آنے والے کسی نے اس سے اخوان کے بارے میں بات کی ہے، اور نہ ہی اس نے کسی کو اس بارے میں بات کرتے سنا ہے۔ وہ کہتا کہ مسجد میں صرف نماز، قرآن کی تعلیم اور دینی تعلیم ہوتی ہے، تو کیا یہ غلط ہے؟ اس پر ماں کہتیں، نہیں، پھر اسے نصیحت کرتیں کہ ہوشیار رہے اور ایسے معاملات میں نہ پڑے جو مشکل پیدا کریں، اور حسن انہیں یقین دہانی کراتا اور مذاق کرتا۔ آخر میں ماں مطمئن ہو کر چلی جاتیں۔ میں، محمود، حسن اور ماں کے درمیان ہونے والی باتیں سنتا رہتا۔محمود کی باتیں زیادہ منطقی لگتی تھیں، لیکن حسن کی سادگی اور معصومیت زیادہ اطمینان بخش تھی۔ شاید حسن نے اچھا کیا کہ اس نے مجھے نماز پڑھنے اور مسجد جانے کی ترغیب دی، میں کبھی نماز پڑھتا اور کبھی چھوڑ دیتا۔ میں نے کئی بار اس کے ساتھ مسجد جا کر مغرب اور عشاء کے درمیان ہونے والے ’’حلقہ‘‘ میں شرکت کی، جو شیخ احمد کی سربراہی میں ہوتا تھا۔ میں نے کئی بار سورۃ الزمر اور المدثر کی تفسیر کی نشستوں میں شرکت کی، شیخ کا کلام بہت پر اثر اور خوبصورت تھا۔ جب وہ جنت اور آخرت کے مناظر، عذاب اور نعمتوں کو بیان کرتے تھے، وہ بیان کرتے تھے کہ رسول اللہ ﷺ نے اللہ کے احکامات کیسے قبول کیے، دعوت کی ذمہ داری اٹھائی اور اس کو کیسے پہنچایا۔

حسن نے صنعت سے گریجویشن کی اور فوری طور پر غزہ کے علاقے زیتون میں ایک لوہار اور مکینک ورکشاپ میں معقول تنخواہ کے ساتھ ملازمت حاصل کر لی۔ اس وعدے کے ساتھ کہ اگر اس نے اپنی فنی صلاحیتیں اور قابلیتیں ثابت کیں تو اسے مزید اضافہ ملے گا۔ یہ واضح ہو چکا تھا کہ کئی سالوں کی غربت اور قحط سالی کے بعد ہم اپنی زندگی کے سنہری دور میں داخل ہو چکے ہیں۔ اس وقت میں اپنی مڈل کی تعلیم مکمل کرنے کے قریب تھا، اور مرے چچا زاد ابراہیم نے ہائی سکول شروع کر دیا تھا، اور میرا بھائی محمد سائنس سیکشن کے دوسرے سال میں تھا، تہانی(میری بہن) نے ہائی سکول کی تعلیم مکمل کی اور غزہ میں ٹیچرز ٹریننگ کالج میں داخلہ لینے کے لیے رجسٹریشن کروا لی اور اس وقت نتائج کا انتظار کر رہی تھی، ایسا لگتا تھا کہ دنیا ہم پر دوبارہ مسکرا رہی ہے۔

کئی سالوں غائب رہنے کے بعد ہمارا چچا زاد حسن دوبارہ ہمارے سامنے آیا، لیکن ایک نئی شکل میں، وہ اب بڑا آدمی بن چکا تھا، اس نے اپنی داڑھی اور بالوں کو رنگ لیا تھا، اور اس کے کپڑے عجیب اور خوفناک تھے، جیسے یہودیوں کے کپڑے، اس نے اپنی گردن میں سونے کی چین پہن رکھی تھی اور کلائی کے گرد موٹی سونے کی چین باندھی ہوئی تھی۔ اس نے ایک پھٹی ہوئی جینز کی پینٹ پہنی ہوئی تھی اور اس کے ہاتھ میں سگریٹ کا پیکٹ تھا۔ وہ بالکل کسی دوسرے سیارے سے آیا ہوا معلوم ہوتا تھا۔ اس نے دروازہ کھٹکھٹایا، میں نے دروازہ کھولا اور پہلی بار میں اسے پہچان نہ سکا۔ اس نے میرے بالوں میں اپنی انگلیاں ڈال کر کہا : تم احمد ہو؟ میں نے اس کی آواز سے پہچانا : تم حسن ہو ؟ اس نے کہا : ’’ہاں‘‘ تو میں چلایا، ’’ماں، محمود ! یہ میرا چچا زاد حسن ہے جو واپس آ گیا ہے۔ سب اپنے کمروں سے دوڑتے ہوئے دروازے کی طرف آئے، اور حسن نے اندر کی طرف دو تین قدم بڑھائے۔ ہر کوئی جو دوڑتا ہوا آیا، جیسے ہی اس نے حسن کو دیکھا، رک گیا جیسے انہیں بجلی کا جھٹکا لگا ہو۔ کوئی نہیں جانتا تھا کہ کیا کہے، سب سے پہلے میرے بھائی محمود نے ہوش سنبھالا، آگے بڑھا اور سلام کیا۔ پھر ابراہیم نے بھی سلام کیا، اور محمود نے اسے اپنے کمرے میں لے لیا، ہم سب بھی ان کے پیچھے گئے اور میری ماں چائے بنانے چلی گئیں۔

ہم کمرے میں بیٹھ گئے اور محمد نے اس سے پوچھنا شروع کر دیا کہ اس کے ساتھ کیا ہوا؟ اور وہ کس طرح یہاں تک پہنچا؟ اور اس کی خبر کیا ہے؟ اس نے ہمیں بتایا کہ وہ تل ابیب میں رہتا ہے اور اپنی یہودی گرل فرینڈ کے والد کی فیکٹری میں کام کرتا ہے، اور اس کی صورتحال بہت اچھی ہے۔ اس نے بتایا کہ وہ یافا میں ایک شاندار کرائے کے فلیٹ میں رہتا ہے۔ اہم بات یہ تھی کہ وہ عربی بولتے ہوئے ہکلانے لگتا تھا اور اپنی بات چیت میں عبرانی الفاظ کثرت سے استعمال کرتا تھا۔ میری ماں چائے لے کر آئیں اور اسے میز پر رکھ دیا۔ اس نے میری ماں سے پوچھا : آپ کیسی ہیں چچی ؟ انہوں نے جواب دیا : ’’الحمدللہ‘‘ اس نے کہا : اہم بات یہ ہے چچی کہ آپ نے اچھی زندگی گزاری، لیکن مجھے دیکھو کیمپ کی بدبختی اور محرومی سے میں باہر نکلا، دنیا دیکھی، اور سکون سے زندگی گزاری۔ میری ماں نے طنزیہ لہجے میں کہا : ہاں، دنیا دیکھی اپنی یہودی گرل فرینڈ کے ساتھ۔

اس نے کہا : اچھا، تو یہودیت میں کیا مسئلہ ہے؟ اسی اثناء میں محمود داخل ہوا اور پوچھنے لگا: خاص بات کیا ہے حسن بتاؤ ؟ حسن نے جواب دیا : نہ پہلے نہ بعد، بس میں آیا ہوں تم لوگوں کو سلام کرنے اور ابراہیم کو دیکھنے۔ اس نے اپنے جیب میں ہاتھ ڈالا، اپنا بٹوہ نکالا اور اس میں سے ایک بڑی گڈّی نوٹوں کی نکالی، اور ایک بڑی رقم شمار کر کے ابراہیم کی طرف بڑھائی۔ ابراہیم نے کوئی حرکت نہیں کی اور ہم سب خاموش رہے۔حسن نے کہا : لے لو ابراہیم، ابراہیم نے جواب دیا : نہیں، شکریہ! میں اپنے چچا کے گھر رہنا چاہتا ہوں جیسے دوسرے لوگ رہتے ہیں، مجھے کسی چیز کی کمی نہیں۔ حسن نے کہا : لے لو، میں تمہارا بھائی ہوں۔ ابراہیم نے جواب دیا : تم میرے بھائی تب ہو، جب تم گھر لوٹ کر ہمارے ساتھ رہو گے اور یہودیوں اور ان کی زندگی کو چھوڑ دو گے۔حسن نے کہا : آرام سے ابراہیم آرام سے، کیا تم یہ چاہتے ہو کہ میں کیمپ لوٹ آؤں ؟ تم ہی میرے ساتھ کیوں نہیں آتے ؟ ابراہیم نے جواب دیا : اللہ کی پناہ ! حسن نے کہا : جیسے تمہاری مرضی۔ محمود نے حسن سے بات چیت شروع کر دی اور اسے گھر واپس آنے کے لیے قائل کرنے کی کوشش کی کہ اس کا گھر ابھی بھی اس کا انتظار کر رہا ہے اور وہ اسے بنا اور سجا سکتا ہے اور ہم اس کی بہترین لڑکی سے شادی کروا سکتے ہیں، اور اس کے لیے ایک معزز کام تلاش کر سکتے ہیں۔ حسن پورا وقت مسکراتا رہا اور انکار کرتا رہا، پھر گرم جوشی سے الوداع کہہ کر چلا گیا۔

میری ماں محمود کو شادی کے لیے قائل کرنے کی کوشش کرتی رہیں اور وہ یہ کہہ کر ٹالنے کی کوشش کرتا رہا کہ گھر چھوٹا ہے اور شادی کے لیے مناسب نہیں ہے۔ تو انہوں نے اسے قائل کرنے کی کوشش کی کہ یہ عارضی ہو گا جب تک کہ وہ توسیع نہ کر لیں۔ ہمارے پاس ابھی گھر میں تین کمرے ہیں، ایک جو ہم نے نیا بنایا ہے، اور دو پرانے کمرے جو ہم نے مرمت کیے ہیں، جہاں وہ، تہانی اور مریم ایک میں رہتے ہیں اور میرا بھائی حسن، محمد اور میں اور میرا چچا زاد بھائی ابراہیم دوسرے میں رہتے ہیں، اور وہ اپنی بیوی کے ساتھ نئے کمرے میں رہے گا۔

پھر وہ پوچھتا کہ اگر ہمارے پاس مہمان یا ملنے والے آئیں تو وہ کہاں بیٹھیں گے؟ تو وہ جواب دیتی کہ بچوں کے کمرے میں یا میرے اور لڑکیوں کے کمرے میں۔ کیا کیمپ کے تمام لوگوں کا یہی حال نہیں ہے ؟ اور اس کے علاوہ ہمارے پاس تمہارے چچا کا گھر بھی ہے اور ہم اس کے ایک کمرے کو مرمت کر کے اس میں توسیع کر سکتے ہیں اور واقعی یہ طے پایا کہ چچا کے گھر کے دو کمروں کو مرمت کیا جائے تاکہ ایک محمود اور اس کی بیوی کے لیے ہو، اور دوسرا حسن کے لیے جب وہ شادی کر لے۔ اور نیا کمرہ مہمانوں کے استقبال کے لیے رہے، نئے کمروں کی تعمیر کے بعد محمود نے اپنی ماں کو تجویز دی کہ اس کی شادی چند ماہ کے لیے ملتوی کر دی جائے اور وہ اور حسن ایک ساتھ شادی کریں تاکہ دو شادیوں کے اخراجات کی بجائے ایک ہی شادی کا خرچ ہو، اور حسن کے شادی کے اخراجات بچا لیے جائیں۔ بیچارے نیک دل حسن نے اپنی تعلیم میرے اور گھر کی خاطر قربان کر دی۔

تو پھر ہماری خوشیوں کو ایک کر دیں۔ میری ماں نے اس خیال کو قبول کیا اور حسن کو قائل کرنے کے لیے بات کرنے لگیں، کمرہ تیار ہے اور شادی ہوگی اور ضرور ہوگی۔ کئی دنوں کی کوششوں اور دباؤ کے بعد حسن نے بھی رضامندی ظاہر کی، اور میری ماں نے دونوں کے ساتھ ایک طویل گفتگو شروع کی کہ وہ کس کو پسند کرتے ہیں؟ یا وہ کس قسم کی لڑکی چاہتے ہیں؟ اور انہوں نے ماں کو فلاں فلاں کی بیٹی کی تجویز دی، اور ماں نے ان گھروں کے چکر لگائے تاکہ لڑکیوں کو ان کے گھروں میں دیکھ سکیں، اور گھروں کی صفائی اور ترتیب، اور گھر والوں کے عادات کا جائزہ لیا، اور مطلوبہ معیار سے غیر مطمئن واپس آئیں۔ تہانی نے میری ماں کو اپنی ایک سہیلی کو دیکھنے کا مشورہ دیا جو معلمات کے انسٹی ٹیوٹ میں تھی، جو چودھویں کے چاند کی طرح خوبصورت اور اخلاقی لحاظ سے بہترین تھی، اور ہمارے طبقے سے تعلق رکھتی تھی، اور اس کے گھر والے سادہ اور محترم لوگ تھے۔ میری ماں نے تہانی کے ساتھ اس لڑکی کے گھر جانے کا منصوبہ بنایا، ہم گئے اور میری ماں انتہائی مطمئن اور خوش واپس آئیں کیونکہ انہوں نے محمود کے لیے مناسب دلہن تلاش کرلی تھی۔ بس یہ باقی تھا کہ وہ اسے پسند کرے اور لڑکی اور اس کے گھر والے رضامند ہوں اور کون چیف انجینئر محمود صالح سے انکار کرے گا ؟ میری ماں نے محمود سے بات کی اور اس لڑکی کے بارے میں بتایا تو اس نے ابتدائی رضامندی ظاہر کی کہ وہ لڑکی کو دیکھنے کے بعد حتمی فیصلہ کرے گا۔

میری ماں نے دوبارہ ابو محمد سعید کے گھر کا چکر لگایا، وہاں انہوں نے ام محمد سے بات کی کہ ہم ان کی بیٹی ’’وداد‘‘ کے لیے محمود کی طرف سے رشتہ بھیجنے کا شرف حاصل کرنا چاہتے ہیں، تو کیا ہم باضابطہ طور پر آئیں؟ ام محمد نے گھر میں جلد مشاورت کے بعد کہا :’’آپ کو خوش آمدید‘‘، اور انہوں نے جمعے کے بعد کا وقت طے کیا۔ جمعہ کے دن میرے ماموں بھی وفد میں شامل ہونے آئے، اور میری بہن فاطمہ بھی آئی، میری ماں، محمود، حسن اور تہانی تیار ہو کر دلہن کے گھر گئے۔ حسب معمول مرد ایک کمرے میں بیٹھے اور عورتیں دوسرے کمرے میں، اور بہت ساری خیرمقدمی اور تعریفی باتیں ہوئی۔ آخر میں، محمود اور وداد نے ایک دوسرے کو دیکھا اور دونوں نے ایک دوسرے کے بارے میں پسندیدگی اور رضامندی ظاہر کی تو زغارید (خوشی کے نعرے) بلند ہوئے اور ان کی منگنی کا اعلان کیا گیا، اور دو ماہ بعد نکاح اور شادی کے لیے اتفاق ہو گیا، تاکہ اہم ضروری کاغذی کارروائی مکمل کر سکیں، خاص طور پر حسن کے لیے دلہن کی تلاش مکمل کر سکیں، اور وداد معلمات کے انسٹی ٹیوٹ سے ڈپلومہ مکمل کر کے سند حاصل کر سکے۔

میری ماں نے حسن کے لیے مناسب دلہن کی تلاش جاری رکھی، اور آئے روز کسی نہ کسی لڑکی کو دیکھنے جاتیں تو کبھی ان کو ایک پسند نہیں آتی کہ اس کے بال گھنگریالے تھے، کبھی اس لیے کہ اس کی ناک لمبی تھی، کبھی اس لیے کہ اس کے دانت بڑے تھے، کبھی اس لیے کہ اس کا گھر صاف نہیں تھا۔ ہر دفعہ ماں اپنی تلاش سے واپس آکر حسن کو تفصیلی رپورٹ دیتی اور ساتھ میں تہانی بھی ہوتی۔ کافی محنت کے بعد حسن نے ماں سے پوچھا : ماں ! آپ کیوں اتنی محنت کر رہی ہیں؟ ماں نے غصے اور محبت سے جواب دیا : کیوں نہ کروں، حسن، تم کسی سے کم ہو کیا ؟ حسن ہنستے ہوئے بولا : ماں، غلط مت سمجھیں، میرا مطلب یہ ہے کہ دلہن تو یہاں نزدیک ہی ہے اور آپ کی نظر کے سامنے ہے۔ ماں حیران ہو کر بولی : کون؟ کیا مطلب ہے تمہارا ؟ حسن نے کہا : ’’سعاد، ام العبد کی بیٹی، ہماری پڑوسن۔ ماں نے مسکراتے ہوئے چھیڑا : واقعی تمہیں وہ پسند ہے، حسن ؟ حسن شرماتے ہوئے بولا : ماں، آپ مجھے جانتی ہیں، میں نے کبھی اس پر نظر نہیں ڈالی، لیکن وہ لڑکی خوبصورت، محترم اور ہماری طرح سادہ ہے، جیسے کہا جاتا ہے : اپنے ہی وطن کی مٹی سے گارا بناؤ۔ ماں نے سنجیدگی سے پوچھا : کیا تم اسے واقعی پسند کرتے ہو؟ حسن نے جواب دیا : ہاں، پوری سنجیدگی سے۔

ماں نے تہانی کو بلایا اور اسے بتایا، تہانی نے حیرت سے پوچھا : کیا تم واقعی اسے پسند کرتے ہو ؟ حسن نے جواب دیا : ہاں، تہانی نے کہا : واقعی وہ خوبصورت محترم اور ایک عزت دار خاندان کی لڑکی ہے، ہم نے پہلے کیوں نہ سوچا ؟ حسن نے جواب دیا ؟ یہی دنیا کا حال ہے، سونا تمہارے ہاتھ میں ہوتا ہے اور تم دور دیکھتے ہو۔ ماں جلدی سے بولی : کل صبح ہی میں اس کا رشتہ مانگنے جاؤں گی، اللہ کے فضل سے، اور واقعی صبح سویرے ماں نے ام العبد سے صاف صاف بات کی اور بتایا کہ وہ سعاد کا رشتہ حسن کے لیے مانگ رہی ہے۔ ام العبد نے دوپہر تک کا وقت مانگا تاکہ اپنی بیٹی اور بیٹوں کی رائے لے سکے۔ دوپہر کو جب ماں ام العبد کے گھر گئی تو دونوں کے زغرد سن کر ہمیں جواب معلوم ہو گیا، اور آس پاس کی پڑوسنیں بھی مبارکباد دینے آگئیں۔

شادی کی تیاریاں زور و شور سے شروع ہوگئیں، دلہن اور دولہا کے لیے گھر کا سامان خریدنا، دونوں کے کپڑوں کا انتظام کرنا، تقریباً ایک مہینے تک ماں کبھی ام العبد کے گھر، کبھی ابو محمد سعید کے گھر اور کبھی شہر کے مرکز میں کپڑے اور زیورات خریدنے میں مصروف رہیں۔ آخر کار تمام تیاریاں مکمل ہو گئیں اور نکاح اور شادی کا دن آ پہنچا۔ مجھے اور محمد اور میرے چچا زاد ابراہیم کو بہت ساری چیزیں تیار کرنی تھی، ہم نے کئی بید کی کرسیاں کرائے پر لیں اور انہیں ایک ریڑھی پر لے جا کر دروازے کے سامنے رکھ دیا۔ ہم بقلاوے کی ٹرے لائے، کافی مقدار میں گوشت اور دو بوری چاول خریدے اور ہمسایوں سے بڑی تعداد میں ٹرے جمع کیں، ہر ٹرے پر گھرانے کا نام لکھا تاکہ ٹرے آپس میں نہ مل جائیں۔ میری ماں نے اپنی تین پڑوسی خواتین کے ساتھ مل کر کھانا بنانے میں مدد کی اور نگرانی کی، ہم نے شادی کا سٹیج تیار کیا، چند میزیں ادھار لیں، انہیں آپس میں باندھا اور دیوار کے ساتھ مضبوط کیا، پھر انہیں قالین اور چٹائیوں سے ڈھانپ دیا اور دو ڈبل بانس کی کرسیاں جو ہم نے پڑوسیوں سے ادھار لی تھیں، ان پر نماز کی چادریں بچھا دیں۔ پھر ہم نے ایک لمبی بجلی کی تار تلاش کی اور اسے ایک دور کے گھر سے جوڑا جہاں بجلی تھی، کیونکہ صرف کچھ ہی گھروں میں بجلی تھی، جو مالی طور پر بہتر حالت میں تھے۔ ہم نے رنگ برنگی لائٹوں کی ایک تار کرائے پر لی اور اسے شادی کے اسٹیج کے اوپر لٹکا دیا۔ یہ سب کچھ دوپہر کے بعد مکمل ہو گیا اور مہمان آنے لگے، عورتیں گھر کے اندر بیٹھ گئیں اور مرد باہر سڑک پر بنے شیڈ کے نیچے بیٹھے۔ عورتوں کے نغمے اور خوشی کے نعرے مسلسل جاری رہے، پھر ہم نے کھانا پیش کرنا شروع کیا، چاول کی ٹرے جن پر سرخ گوشت کے ٹکڑے تھے۔ پھر میں، محمود اور ابراہیم صابن کے ٹکڑے اور مٹی کے پانی کے جگ لیے کھڑے ہو گئے اور ہمارے کندھوں پر کاٹن کے تولیے تھے، جو مہمان کھانا کھا چکے تھے، وہ ہمارے پاس آئے، ہم میں سے ایک نے انہیں صابن کا ٹکڑا دیا اور دوسرے نے ان کے ہاتھوں پر پانی ڈالا، تاکہ وہ اپنے ہاتھ اور منہ دھو سکیں۔ وہ ہمیں مبارکباد دیتے اور پھر ہم انہیں تولیہ دیتے تاکہ وہ اپنے ہاتھ خشک کر سکیں۔ اس کے بعد وہ بقلاوے کی ٹرے سے میٹھا کھانے جاتے، کھانا ختم ہونے کے بعد بہت سے مہمان اپنے گھروں کو واپس چلے گئے اور دولہا دلہن کے گھر والوں کے ساتھ کچھ قریبی رشتہ دار اور دوست باقی رہے۔ عورتیں گانے اور خوشی کے نعرے لگاتے ہوئے ایک نئے گھر کی طرف چل پڑیں، ان کے ساتھ ڈھول بھی بجتا رہا۔ جب وہ ابو محمد کے گھر کے قریب پہنچیں تو وہ شادی کے نغمے گانے لگیں۔ جب وہ دروازے تک پہنچیں تو اندر سے خوشی کے نعرے گونجے، مرد ایک کمرے میں داخل ہوئے جہاں مولوی صاحب موجود تھے، جنہوں نے نکاح کی رسم مکمل کی اور اسے دستاویزی شکل دی، اس کے بعد مرد باہر آئے اور دروازے کے باہر انتظار کرنے لگے، دلہن تیار ہو کر باہر آئی، والد نے اس کا بازو پکڑا اور ایک بھائی نے دوسرا بازو پکڑا اور اسے محمود کے حوالے کر دیا، جبکہ زغارید (خوشی کی آوازیں) بلند ہو رہی تھیں اور قافلہ گھر کی طرف واپس چل پڑا۔ دلہن کو گھر میں داخل کیا گیا اور کچھ خواتین اس کے ساتھ رہیں اور کچھ گانے اور زغارید گاتی رہیں۔ پھر قافلہ دوبارہ نکلا اور چند قدموں پر موجود دوسری دلہن کے گھر پہنچا، اسی طریقے اور انہی اقدامات کے ساتھ، سعاد کے بھائیوں نے اس کا بازو پکڑا اور اسے حسن کے حوالے کر دیا جو زغارید اور گانوں کے درمیان اسے گھر لے آیا۔

دو دلہنوں کو ایک ہی کمرے میں داخل کیا گیا تاکہ وہ زفاف (شادی کی تقریب) کی تیاری کر سکیں۔ میری ماں نے محمود اور حسن سے کہا کہ وہ زفاف کے اسٹیج پر جا کر اپنی اپنی کرسی پر بیٹھ جائیں اور اپنی دلہن کا انتظار کریں تاکہ وہ ان کے ساتھ بیٹھ سکیں اور زفاف کی رسم حسب معمول ہو سکے۔ محمود کے لیے کوئی مسئلہ نہیں تھا، لیکن حسن نے سختی سے انکار کر دیا اور کہا : میں کیسے بیٹھ سکتا ہوں جبکہ خواتین میرے سامنے ناچیں گی، یہ حرام ہے۔ میری ماں حیران رہ گئی اور اس سے درخواست کرنے لگی کہ یہ ہماری زندگی کی وہ خوشی کا دن ہے جس کا ہم نے طویل عرصے سے انتظار کیا ہے۔ محمود نے بھی حسن سے درخواست کی کہ وہ شادی کی خوشی کو خراب نہ کرے، لیکن حسن نے سختی سے انکار کر دیا۔ گفتگو جاری رہی اور لمبی ہوگئی، آخرکار فاطمہ نے ایک درمیانی حل پیش کیا کہ محمود اور حسن آدھے گھنٹے کے لیے اسٹیج پر چڑھ جائیں اور اس دوران خواتین ناچنے کی بجائے صرف نغمے اور زغارید کریں، پھر دلہنیں اسٹیج سے نیچے اتر جائیں گی اور ایک کرسی ہٹا دی جائے گی اور ایک کرسی پر بیٹھ جائیں گی اور خواتین ان کے ساتھ جیسے چاہیں برتاؤ کر سکیں گی۔ محمود نے اس پر اتفاق کیا اور حسن نے بھی آخر کار مان لیا، دونوں اسٹیج پر چڑھ گئے اور اپنی اپنی کرسی پر بیٹھ گئے، پھر دلہنیں باہر آئیں اور اپنے اپنے شوہر کے ساتھ بیٹھ گئیں، اور خواتین نے نغمہ اور زغارید کرنا شروع کر دیا۔

میری ماں کے آنسو مسلسل ان کے چہرے کو دھو رہے تھے، اور فاطمہ ان کے دائیں جانب اور تہانی بائیں جانب انہیں تسلی دینے کی کوشش کر رہی تھیں، رو کیوں رہی ہیں، یہ وہ خوشی کا دن ہے جس کا آپ نے طویل عرصے سے انتظار کیا ہے۔ میری ماں اپنے آنسو پونچھتیں اور پھر سے رو پڑتیں اور آہستہ سے کہتیں کہ اگر تمہارے والد آج یہاں ہوتے تو، اس بات پر فاطمہ اور تہانی بھی آنسو بہانے لگتیں اور آہستہ سے کہتیں: کیوں اس زخم کو دوبارہ کھول رہی ہیں، ماں ؟ یہ تو پہلے ہی بھر چکا ہے ۔

دلہنیں اپنے سفید لباس تبدیل کرنے کے لیے نیچے اتر آئیں، اور ایک کرسی لے لی جبکہ دوسری کو اسٹیج کے وسط میں رکھ دیا۔ محمود نے حسن کو چھیڑتے ہوئے کہا، ’’شیخ صاحب، ہر روز تو شادی نہیں ہوتی، واقعی تم تو اخوانی نکلے۔ پتہ نہیں کس نے میرے ساتھ تمہاری شادی کرائی، اللہ تمہیں جزا دے‘‘۔ حسن مسکراتے ہوئے بولا : چلو چلو، عورتوں کو خوش ہونے دو، ان کے پیچھے خواتین کے گانے اور زغارید کی آواز بلند ہو رہی تھی اور انہوں نے میری ماں کو زبردستی اس مجمع میں گھسیٹ لیا، پھر ام العبد اور ام محمد کو بھی مجبور کیا، وہ یہ نہیں سمجھ سکتی تھیں کہ ان آنسوؤں کا مطلب اس خوشی کے دوران کیا ہے، لیکن یہ کیمپ کی حالت ہے، ہر خوشی پرانے زخموں کو پھر سے کھول دیتی ہے اور سب یادیں تازہ ہو جاتی ہیں۔

٭٭٭٭٭