یومِ حشر کے دیگر نام

آج ہم ایک نیا باب شروع کریں گے جس میں ہم قیامت کے دن کے دیگر ناموں سے متعلق گفتگو کریں گے۔ یوم حشر کے بہت سے نام ہیں اور یہ اس لیے کہ یہ بہت اہم دن ہے۔ عربی زبان بلکہ دنیا کی اور بھی بہت سی زبانوں میں کسی بھی اہم چیز کو بہت سے نام دیے جاتے ہیں۔ مثلاً عربوں کے یہاں گھوڑوں کے لیے بہت سے نام ہیں، گھوڑوں کی اقسام، ان کے رنگوں کے حساب سے اور محض گھوڑے کے لیے بھی بہت سے نام ہیں۔ اسی طرح جیسے انگریزی زبان میں شراب کے بہت سے نام ہیں کیونکہ وہ ان کے لیے بہت اہم ہے، جبکہ چونکہ مسلمان یہ جانتا ہے کہ شراب حرام ہے لہٰذا اس کے لیے اس حرام چیز کی اتنی اہمیت اور نام ہونا ابہام کا باعث ہے۔ البتہ جو لوگ اسے استعمال کرتے ہیں ان کے لیے یہ اہم ہے اور اسی وجہ سے اس کی بہت سی قسمیں اور بہت سے نام ہیں ۔ قبل از اسلام عرب میں خمر یعنی شراب خصوصی اہمیت کی حامل تھی اس لیے اس کے اسّی نام تھے ۔

یوم حشر کی اہمیت کی وجہ سے اسے بھی بہت سے نام دیے گئے ہیں اور یہ تمام نام دراصل اس دن واقع ہونے والے حالات و واقعات کی مناسبت سے ہیں۔

1. یوم القیامۃ:

سب سے زیادہ استعمال ہونے والا نام قیامت ہے۔ القیامۃ، قیام سے ہے جس کا معنی کھڑے ہونا ہے۔ یوم حشر کو کھڑے ہونے والا دن اس لیے کہا جاتا ہے کہ :

یہ وہ دن ہو گا کہ جب لوگ اللہ تعالیٰ سے ملاقات کے لیے کھڑے ہوئے ہوں گے، اس دن کوئی بھی لیٹا یا بیٹھا ہوا نہیں ہو گا بلکہ تمام لوگ کھڑے ہوں گے۔ قیامت کے دن، یعنی پچاس ہزار سال تک لوگ کھڑے رہیں گے۔ اسی لیے اس دن کو کھڑے ہونے کا دن کہا گیا ہے۔

پس یوم حشر کا ایک نام قیامت ہے ۔

2. یوم الآخرۃ:

یوم حشر کے لیے دوسرا سب سے زیادہ استعمال ہونے والا نام یوم آخرت ہے۔ الیوم الآخر کا معنی ہے آخری دن کہ جس کے بعد اور کوئی دن نہیں ہو گا۔ یہ اس دنیا میں آخری دن ہو گا۔

پس یہ یوم آخرت ہے، آخرت جس کا معنی ہے اختتام ۔

3. الساعۃ:

اگلا نام الساعۃ ہے یعنی وہ لمحہ یا وہی لمحہ، تخصیص کے ساتھ۔ یہ سب سے اہم لمحہ ہے۔ امام قرطبیؒ فرماتے ہیں :

’’عربی زبان میں الساعۃ کو جب غیر محدود طور پر استعمال کیا جاتا ہے تو اس کا معنی ہوتا ہے غیر معینہ وقت۔ یعنی یہ لفظ غیر معینہ وقت کے لیے استعمال ہوتا ہے۔ وہ وقت کم بھی ہو سکتا ہے اور زیادہ بھی۔ اس لفظ کو مخصوص طور پر دن بھر کے چوبیس میں سے ایک گھنٹے کے لیے بھی استعمال کیا جا سکتا ہے۔ پس اس کا معنی وہی گھنٹہ بھی ہو سکتا ہے اور وہی لمحہ بھی، یعنی غیر معینہ وقت۔‘‘

مزید فرماتے ہیں کہ الساعۃ، یعنی الف اور لام کے ساتھ، جس کے معنی اس لمحے یا اس گھنٹے کے ہیں، کا معنی ہوگا: یہ لمحہ۔ لہٰذا ان کا یہ کہنا ہے کہ قیامت کے لیے الساعۃ کا نام اس لیے استعمال کیا گیا کہ وہ اس قدر قریب ہے گویا بس یہی لمحہ ۔ یہ ایک تشریح ہے۔

دوسری تشریح اس کی یہ ہے اس گھڑی کو الساعۃ کا نام اس لیے دیا گیا کہ یہ وہ سب سے اہم لمحہ ہے جس میں سب سے اہم واقعہ رونما ہو گا۔

اور اس کا یہ نام اس لیے بھی ہو سکتا ہے کہ یہ گھڑی اچانک بس ایک لمحے میں آ جائے گی۔

یہ تینوں تشریحات امام قرطبیؒ نے بیان فرمائی ہیں۔

الساعۃ یوم حشر کے ان ناموں میں سے ہے جو یوم قیامت کے لیے قرآن و حدیث میں بار ہا استعمال ہوئے ہیں۔ اللہ فرماتے ہیں:

4. یوم البعث:

یعنی دوبارہ اٹھائے جانے کا دن۔ اور یہ نام اس دن کو اس لیے دیا گیا ہے کہ اس دن ہمیں ایک نئی زندگی عطا کی جائے گی اور ہمارے جسموں کو دوبارہ تخلیق کیا جائے گا۔ ہم دوسری مرتبہ تخلیق کیے جائیں گے۔ اللہ فرماتے ہیں:

اگر تم یہ سمجھتے ہو کہ ہم تمہیں دوبارہ تخلیق کرنے پر قادر نہیں ہے تو پھر ہم نے تمہیں پہلی مرتبہ کیسے تخلیق کیا تھا؟

5. یوم الخروج:

اسے باہر نکلنے کا یا ظاہر ہونے کا دن اس لیے کہا گیا کہ اس دن انسان اپنی قبروں سے باہر نکلیں گے۔ اللہ فرماتے ہیں:

6. القارعۃ:

اس کا معنی ہم قہر سے کرسکتےہیں۔ تَقْرَعُ القُلوب، ایسی چیز جو دلوں پر چوٹ لگائے گی، دل دہلا دے گی، لہٰذا یہ ایک آفت ہے۔ اللہ فرماتے ہیں:

7. یوم الفصل:

فیصلے کا دن۔ یوم الفصل وہ ہے کہ جس دن تمام نزاعات کا فیصلہ ہو گا۔ اختلاف آراء ختم ہو جائیں گے اور اللہ رب العزت انسانیت اور جو کچھ انسانوں نے کہا اور کیا ہو گا کے مابین فیصلہ فرمائیں گے۔ اللہ فرماتے ہیں:

8. یوم الحسرۃ:

حسرت و ندامت کا دن۔ اس روز پچھتاوے ہی پچھتاوے ہوں گے۔ کافر اپنے ایمان نہ لانے پر نادم ہوں گے اور مسلمان پچھتاتے ہوں گے کہ کاش مزید اور بہتر اعمال لے کر پیش ہوتے۔ ہر طرف حسرت سی حسرت ہو گی۔ اللہ فرماتے ہیں:

تصور کریں کہ حسرت، ندامت اور دکھ و ملال کی وجہ سے اس روز انسان اپنے دونوں ہاتھ، نہ کہ صرف انگلیاں، اپنے منہ میں ٹھونسے گا اور اپنی انگلیاں چبائے گا ۔

9. یوم الحساب:

جانچ پڑتال اور حساب کتاب کا دن۔

یہ حساب کتاب کا دن ہے اور حساب بھی ایسا دقیق کہ ہر چیز سامنے لائی جائے گی، حتی کہ ذرہ برابر چیز بھی نہ چھوڑی جائے گی خواہ وہ رائی کے دانے کے برابر ہی کیوں نہ ہو۔ ﴿…اِنْ تَكُ مِثْقَالَ حَبَّةٍ مِّنْ خَرْدَلٍ…﴾

پس اللہ عز و جل ہمارے ہر قول و عمل کو لا حاضر کرے گا۔ جو کچھ جب بھی ہم نے کہا ہو گا وہ سامنے آ جائے گا اور جو عمل بھی ہم نے کبھی کیا ہو گا وہ بھی سامنے آ جائے گا۔

10. الواقعۃ:

وہ واقعہ، وہ حادثہ، سب سے اہم واقعے کا بپا ہونا۔

11. الحاقۃ:

اٹل حقیقت، ناگزیر حق۔

12. یوم التلاق:

ملاقات کا دن۔

اسے ملاقات کا دن کیوں کہا جاتا ہے؟ ابن کثیرؒ فرماتے ہیں کہ اسے ملاقات کا دن اس لیے کہا جاتا ہے کہ اس دن آدمؑ اپنے آخری بیٹے سے ملاقات کریں گے۔

آدمؑ کی تمام اولاد اس روز آمنے سامنے ہو گی۔ جبکہ قتادہؒ اور السُدّیؒ فرماتے ہیں کہ یہ وہ دن ہو گا کہ جب زمین کی مخلوق آسمان کی مخلوق سے ملے گی اور خالق اپنی مخلوق سے ملاقات فرمائے گا۔

اور میمون بن مہران کہتے ہیں کہ اس روز ظالم مظلوم کے سامنے آئے گا۔

13. یوم التناد:

پکار کا دن۔

اسے چیخ و پکار کا دن اس لیے کہا گیا ہے کہ اس روز ہر طرف پکار بلند ہو رہی ہو گی۔ ہر ایک فرداً فرداً پکارا جائے گا، نیز مظلومین ظالموں کو پکارتے ہوں گے اور بندے اپنے ان معبودوں کو پکاریں گے جن کی وہ عبادت کرتے تھے۔

ہم نے حشر کے دن کے مختلف معانی کے بارے میں بات کی۔ اس دن کے لیے سب سے زیادہ قیامت کا لفظ استعمال ہوتا ہے۔ اور ہم نے جانا کہ قیامت کے دن کا یہ نام اس لیے بھی ہے کہ وہ کھڑے ہونے کا دن ہو گا۔ اس روز کوئی بیٹھنا، لیٹنا، کوئی آرام نہ ہو گا۔ اس پچاس ہزار برس کے برابر طویل دن میں بہت سے حوادث رونما ہوں گے اور ان میں سے سب سے اہم حادثہ یا واقعہ حساب کتاب ہے۔

حشر کے دن کے بہت سے مرحلے ہیں جن میں سے ایک کائنات کا انقلاب بھی ہے اور اسی مرحلے سے قیامت کے دن کا آغاز ہو گا۔ پھر ایک مرحلہ لوگوں کے جمع ہونے کا، یعنی حشر ہے۔ پھر شفاعت بھی ایک علیحدہ مرحلہ ہے۔ پھر حساب کا مرحلہ ہے جو قیامت کے دن کا سب سے اہم اور ممتاز واقعہ ہے۔ حساب کتاب ہی کے لیے تو قیامت قائم ہو گی۔ اس مرحلے میں لوگوں کے اعمال ناموں کی پڑتال ہو گی اور اسی کی بنیاد پر کسی شخص کے جنتی یا جہنمی ہونے کا فیصلہ ہو گا۔ اللہ رب العزت یوم حساب کے بارے میں فرماتے ہیں:

لوگ اپنے رب کے سامنے حساب کتاب کے انتظار میں صف در صف کھڑے ہوں گے۔

آئندہ حصے میں ہم ان شاءاللہ یوم حشر کے چند اصولوں یا اساس پر بات کریں گے۔

وصلی اللہ تعالیٰ علی خیر خلقہ محمد وعلی صحبہ وسلم

٭٭٭٭٭